Quryltaı saılaýyn baqylaý úshin barlyq jaǵdaı jasalǵan – ShYU baıqaýshylary
ASTANA. KAZINFORM — Qazaqstanda alǵashqy Quryltaı saılaýy oıdaǵydaı ótip jatyr. Bul týraly elordada Halyqaralyq baıqaýshylarǵa járdemdesý ortalyǵyndaǵy baspasóz máslıhatynda Shanhaı yntymaqtastyq uıymy mıssııasynyń ókili, ShYU Bas hatshysynyń orynbasary T.R. Mıdhýn málim etti.
Onyń aıtýynsha, Shanhaı yntymaqtastyq uıymynyń ókilderi Qazaqstan Respýblıkasynyń Quryltaıyna depýtattardy saılaýdyń daıyndyǵyna jáne ony ótkizý barysyn halyqaralyq deńgeıde baıqaý úshin belsendi túrde qatysyp jatyr.
Aıta keteıik, ShYU ókilderi Qazaqstanǵa 20 tamyzda kelip, saılaý aldynda daıyndyq jumystaryn baǵalaý úshin túrli saılaý ýchaskelerine barǵan.
– Búgin tańerteńgi saǵat 6:30-dan bastap bizdiń top Astananyń túrli aýdandaryndaǵy birneshe saılaý ýchaskesin aralady. Qazirgi ýaqytqa deıin biz eshqandaı zań buzý deregin baıqaǵan joqpyz jáne eshqandaı shaǵym túsken joq. Degenmen, protsestiń áli de jalǵasyp jatqanyn atap ótkim keledi. Bizdiń komanda saılaý protsesin baıqaýdy jalǵastyrady, sondyqtan erteń osy jumysty qorytyndylaımyz. Atap aıtqanda osy ýaqytta kúrdeli máseleler bolǵan joq. Menińshe, bári oıdaǵydaı ótip jatyr, - dedi ol.
ShYU mıssııasy aıasynda Uıymǵa múshe alty memleketten kelgen 17 baıqaýshy akkredıtteldi. Olardyń qatarynda ShYU-ǵa múshe memleketterdiń zań shyǵarýshy, atqarýshy jáne saılaý organdarynyń ókilderi, osy memleketterdiń Qazaqstan Respýblıkasyndaǵy dıplomatııalyq ókildikteriniń qyzmetkerleri, sondaı-aq ShYU Hatshylyǵynyń laýazymdy tulǵalary bar.
Osy oraıda ol mıssııa músheleri búgin saılaý ýchaskeleri ashylǵan sátten baıqaýshy retinde jumystaryna kiriskenin aıtty. Baıqaýshylar daýys berý protsesiniń uıymdastyrylýyn, saılaýshylarǵa jasalǵan jaǵdaılardy jáne ýchaskelik komıssııalardyń jumysyn zerdeledi. Bul rette mıssııa ókilderi Astana qalasy men Aqmola oblysy aýmaǵyna bardy.
- Mıssııa músheleri daýys berý ýchaskelerin erkin aralap, baqylaý baǵyttaryn óz betinshe aıqyndaýda. Bizdiń jumysymyz úshin qajetti jaǵdaılar jasalǵan, - dedi T.R. Mıdhýn.
Búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
