Quryltaı saılaýyn 10 myń qoǵamdyq baıqaýshy baqylaıdy
ASTANA. KAZINFORM — Qoǵamdyq baıqaýshylar Quryltaı saılaýyn uzaq merzimdi negizde qadaǵalaıdy. Olar saılaý kúni, sondaı-aq, saıası naýqanǵa deıin jáne odan keıin zańbuzýshylyqtar bolmaýyn baqylaıdy.
«Daýys» qoǵamdyq baıqaýshylar koalıtsııasy jýrnalısterge arnalǵan baspasóz máslıhatyn ótkizdi. Onda uıym ókilderi respýblıka boıynsha 10 myń qoǵamdyq baıqaýshy oqytý úderisterinen, arnaıy semıınarlardan ótip, daıarlanyp jatqanyn málimdedi.
– 23 tamyz saılaý kúnine jaqyndaǵanda, baıqaýshylarymyz saılaý ýchaskelerine baryp, qaraıdy. Múgedektigi bar azamattarǵa tıisti jaǵdaı jasalǵan ba, stendterdegi partııalar týraly aqparattar kólemi birdeı me, ýchaskelerde ózin-ózi ustaý erejesi bar ma, ol qujatqa qol qoıylyp, mórmen bekitilgen be, t.b. máselelerge mán beremiz, – dedi «Daýys» qoǵamdyq baıqaýshylar koalıtsııasynyń tóraǵasy Tólegen Kúnádilov.
Sonymen qatar, qoǵamdyq baıqaýshylarǵa qatysty statıstıkalyq málimetter de aıtyldy. 10 myń azamattyń arasynda: 24-35 jas aralyǵynda – 20%, 35-50 jas aralyǵynda – 70%, 50-65 jas aralyǵynda – 10% baıqaýshy bar.
– Baıqaýshylardyń 60%-dan astamy 500 myńnan astam halqy bar qalalarda, 30%-y aýdan ortalyqtarynda, 10%-y aýyldyq jerlerde turady. Sondaı-aq, olardyń 55%-y áıel adamdar bolsa, 45%-y erler. Baıqaýshylardyń 67%-ynyń tájirıbesi bar. 23%-y aldyńǵy saılaýlarda keminde bir ret baıqaýshy bolǵan. 10%-y alǵash ret baıqaýshy bolǵaly otyr, – dedi koalıtsııanyń teń tóraǵasy Sábıt Ryspaev.
Sonymen qatar, qoǵamdyq baıqaýshylar Quryltaı saılaýyn uzaq merzimdi negizde qadaǵalaıdy. Olar saılaý kúni, sondaı-aq, saıası naýqanǵa deıin jáne odan keıin zańbuzýshylyqtar bolmaýyn baqylaıdy.
Aıta keteıik, buǵan deıin saılaýǵa daıyndyq qalaı júrip jatqanyn jazǵanbyz.
