Quryltaı saılaýy úlken bastamalarǵa jol ashady – Aıdos Sarym
ASTANA. KAZINFORM – QR Parlamenti Májilisi VIII shaqyrylymynyń depýtaty Aıdos Sarym «Quryltaı saılaýy: konstıtýtsııalyq negizder jáne saıası transformatsııa» degen ataýmen uıymdastyrylǵan sarapshylar alańynda aldaǵy saılaýdyń mán-mańyzyna toqtaldy.
– Bizdegi konstıtýtsııalyq reforma eldegi saıası júıeniń arhıtektýrasyn, ekojúıesin jobalaýdyń kezeńin aıaqtady dep aıtýǵa bolady. Aldaǵy Quryltaı saılaýy – jańa Konstıtýtsııanyń praktıkalyq turǵydan júzege asyrý kezeńi. Osy kezde jańarǵan memlekettik, qoǵamdyq ınstıtýttar, saıası ókildik ınstıtýttary jáne qoǵamdyq qatynas ınstıtýttary shyn máninde júzege asa bastaıtyn kezeńge kele jatyrmyz. Sondyqtan aldaǵy kampanııa biz úshin óte mańyzdy. Konstıtýtsııanyń júzege asýyndaǵy eń alǵashqy ınstıtýtsıonaldyq shara – Quryltaı saılaýy. Ol bolashaqta úlken bastamalarǵa jol ashady: Vıtse-prezıdent taǵaıyndalady, jańa Úkimet, búkil basqarýshy organ – sot, Joǵary sot, Saılaý komıssııasy t.b. keledi. Osynyń barlyǵyn qamtamasyz etý úshin aldaǵy Quryltaı saılaýy shyn máninde adal, taza, absolıýtti legıtımdi túrde ótýi kerek. Legıtımdilik – bolashaqta Konstıtýtsııanyń shyn máninde júzege asý kezeńderin qamtamasyz etetin alǵysharty, – dedi ol.
Sonymen birge, sarapshy áleýmettanýlyq zertteýlerdiń nátıjesine júgine otyryp, halyq reformalardan góri, reformalardyń júzege asýyn kútip otyrǵanyn atap ótti.
Aıta keteıik, buǵan deıin Quryltaı saılaýyn ótkizýge qarjy qaıdan bólinetinin jazǵanbyz.
