Quryltaı saılaýy týraly barlyq aqparat bir saıtta: «Quryltaı LIVE» platformasy iske qosyldy
ASTANA. KAZINFORM – Belgili jýrnalıst Abaı Seıfýlla pikirles komandasymen birge jańa birpalataly Quryltaı depýtattarynyń aldaǵy saılaýyna arnalǵan biryńǵaı aqparattyq resýrsty iske qosty.
Qazaqstanda Quryltaı saılaýyna arnalǵan «Quryltaı LIVE» aqparattyq platformasy iske qosyldy. Bul týraly Abaı Seıfýlla áleýmettik jelidegi paraqshasynda habarlady.
– Quryltaı saılaýy qarsańynda jýrnalıst ári aqparat salasynyń ókili retinde men de ortaq iske óz úlesimdi qosyp, azamattarǵa qajetti aqparatty barynsha túsinikti ári qoljetimdi túrde usynǵym keldi. Bir top pikirles azamatpen birge saılaýǵa qatysty barlyq mańyzdy aqparat jınaqtalǵan «Quryltaı LIVE» platformasyn iske qostyq. Osy joba arqyly Quryltaı saılaýyn elimizdiń árbir azamatyna jaqyn ári túsinikti etkimiz keledi, – dedi Abaı Seıfýlla.
«Quryltaı LIVE» platformasynyń basty ereksheligi – onda Quryltaı saılaýyna qatysty barlyq aqparat bir jerge jınaqtalǵan. Sońǵy jańalyqtar, sarapshylardyń pikirleri men teledebat materıaldarynan bastap, daýys berý tártibi men saılaý ýchaskesin izdeýge deıingi málimetterdi osy jerden tabýǵa bolady.
Abaı Seıfýlla – saılaý naýqanyn jarııalap, Quryltaı depýtattyǵyna kandıdattar men táýelsiz sarapshylardyń qatysýymen podkasttar ótkizetin Abay Live YouTube-arnasynyń avtory.
Sondaı-aq ol eldegi ózekti qoǵamdyq-saıası oqıǵalarǵa arnalǵan avtorlyq baǵdarlamalar ázirlep, saıasatkerlermen jáne qoǵam qaıratkerlerimen suhbat júrgizedi. Abaı Seıfýlla túrli alańdarda sarapshy retinde sóz sóılep, kún tártibindegi máselelerdi taldaıdy jáne bolyp jatqan oqıǵalarǵa saraptamalyq baǵa beredi. Jeke saıttyń ashylýy osy jumystyń jalǵasy boldy.
Platformada saılaý naýqanynyń barysy týraly jańalyqtar, saraptamalyq pikirler, áleýmettik zertteýlerdiń nátıjeleri, suhbattar, podkasttar jáne basqa aqparattyq alańdarda jarııalanǵan materıaldar ornalastyrylady.
Qoldanýshylar debattarda qandaı máseleler talqylanatynyn, saıası partııalar men kandıdattardyń ne usynatynyn bile alady, sondaı-aq qoǵamdyq pikirdi zertteý nátıjelerimen tanysa alady. Saıttaǵy aqparat kún saıyn jańartylyp otyrady.
«Saılaý týraly» jeke bóliminde saılaý protsesi jónindegi negizgi málimetter jınaqtalǵan. Onda saıası partııalardy tirkeý, kandıdattardyń sany men quramy, saılaý naýqanynyń kezeńderi jáne saılaýdy baqylaý týraly aqparat bar.
Saıtta jıi qoıylatyn suraqtarǵa jaýaptar da usynylǵan. Azamattar daýys berý úshin qandaı qujattar qajet ekenin, shetelde qalaı daýys berýge bolatynyn, qosymsha aqparat alý úshin qaıda júginý kerektigin jáne óz saılaý ýchaskesin qalaı tabýǵa bolatynyn bile alady.
Osylaısha, «Quryltaı LIVE» Quryltaıǵa aldaǵy saılaý týraly jańalyqtardy, saraptamalyq jáne praktıkalyq aqparatty bir alańǵa biriktiredi.
Abaı Seıfýlla qazaqstandyqtardy jańa resýrspen tanysyp, komandanyń jumysyna baǵa berýge jáne óz usynystarymen bólisýge shaqyrdy.
Aıta keteıik, Quryltaı saılaýyn 777 halyqaralyq baıqaýshy baqylaıdy.
