Quryltaı saılaýy: Tokıoda otandasymyz bı beınesinde daýys berdi
ASTANA. KAZINFORM — Tokıodaǵy saılaý ýchaskesinde alǵashqylardyń biri bolyp otandasymyz Álisher Ázimbaev daýys berdi, ol qazaq qoǵamyndaǵy ádilettilik, zańdylyq pen danalyqtyń sımvoly — bı beınesinde keldi, dep jazady SІM baspasóz qyzmeti.
Tsýkýba ýnıversıtetinde «Memlekettik saıasat» mamandyǵy boıynsha oqıtyn Álisher qazaq halqynyń tarıhı dástúrlerin Qazaqstannyń jas býynynyń zamanaýı umtylystarymen sımvoldyq túrde ushtastyrdy.
Ol quryltaı tarıhı turǵydan Ulttyq jınalys bolǵanyn, onda el taǵdyryn aıqyndaıtyn mańyzdy sheshimder qabyldanǵanyn atap ótti.
— Meniń oıymsha, jańadan qurylǵan Quryltaı bul dástúrdi halyqpen ózara is — qımylda memlekettik mańyzy bar máselelerdi sheshýge arnalǵan qazirgi zamanǵy saıası ınstıtýt retinde jalǵastyrady, — dep atap ótti ol.
Aıta keteıik, Quryltaı saılaýynda alǵash bolyp Seýldegi qazaqstandyq stýdent daýys berdi.
