Quryltaı saılaýy: SQO-da 543 saılaý ýchaskesi jumys isteıdi
PETROPAVL. KAZINFORM - Soltústik Qazaqstan oblysynda saılaý naýqanyna 3 myńnan astam komıssııa múshesi jumyldyrylady.
Oblystyq saılaý komıssııasynyń málimetinshe, óńirde 543 saılaý ýchaskesi bolsa, olardyń 92-si Petropavlda ornalasqan. Sonymen qatar óńirde 13 jabyq saılaý ýchaskesi bar. Olar áskerı bólimderde, medıtsınalyq mekemelerde jáne azamattardyń ýaqytsha bolý oryndarynda ashylǵan.
Saılaý naýqany barysynda 558 saılaý komıssııasy jumys isteıdi. Onyń ishinde 15 aýmaqtyq jáne 543 ýchaskelik saılaý komıssııasy bar. Jalpy saılaý naýqanyna 3 196 komıssııa múshesi qatysady.
Saılaýshylar tizimi ázirge belgisiz. Zańnamaǵa sáıkes daýys berý 20 kún buryn, ıaǵnı tamyzdyń 2-kúni árbir saılaý ýchaskesi boıynsha ákim qol qoıǵan saılaýshylardyń tizimderi akt boıynsha ýchaskelik saılaý komıssııasyna usynylady. Naqty qansha saılaýshy bary sol kúni belgili bolady.
Al 7 tamyzdan bastap azamattar ózderiniń saılaýshylar tizimine engizilgeni týraly málimetpen tanysa alady. Ol úshin ózderiniń tirkelgen saılaý ýchaskesine baryp, derekteriniń durystyǵyn tekserýge múmkindik beriledi.
Buǵan deıin Quryltaı depýtattarynyń saılaýyna taǵy 10 halyqaralyq baıqaýshy akkredıttelgenin jazǵan edik.
