Quryltaı saılaýy: Respublica-nyń partııalyq tiziminen bir kandıdat shyǵaryldy
ASTANA. KAZINFORM — Saıası partııanyń partııalyq tizimderin tirkeý máseleleri boıynsha QR Ortalyq saılaý komıssııasynyń otyrysynda OSK hatshysy Shavhat Ótemisov bir kandıdat tizimnen ne sebepti shyǵarylǵanyn málimdedi.
– Respublica partııasy 76 adamnan turatyn partııalyq tizimdi usyndy. Ortalyq saılaý komıssııasy jibergen saýalǵa sáıkes, ýákiletti memlekettik organdar Quryltaı depýtaty bolyp saılaný úshin partııalyq tizimge engen adamdardyń Konstıtýtsııa men «QR Saılaý týraly» konstıtýtsııalyq zańynyń talaptaryna sáıkestigine tekserý júrgizdi. Ortalyq saılaý komıssııasynda bul tizimdegi Sánııa Baqytjanqyzy Temirǵalıevanyń ony osy partııalyq tizimnen óz erkimen shyǵarý týraly ótinishi 11 shildede resmı tirkeldi. «QR Saılaý týraly» konstıtýtsııalyq zańynyń 90-babynyń 1-tarmaǵyna sáıkes, Respublica partııasynyń partııalyq tiziminen onyń ótinishi negizinde Sánııa Baqytjanqyzy Temirǵalıevany shyǵarý boıynsha Ortalyq saılaý komıssııasy óz quzireti sheńberinde sheshim jobasyn daıyndady, – dedi ol.
Osylaısha, Sánııa Baqytjanqyzy Temirǵalıeva tizimnen alynǵandyqtan, Respublica partııasynyń partııalyq tiziminde bastapqy habarlanǵandaı 76 emes, 75 kandıdat tirkeldi.
– 38 kandıdat – áıelder, jastar jáne múgedektigi bar adamdar. Olardyń úlesi – 50,7%. Zańda belgilengen kvota saqtaldy. Partııalyq tizimge engizilgen barlyq adam Konstıtýtsııanyń jáne «QR Saılaý týraly» konstıtýtsııalyq zańynyń talaptaryna sáıkes keledi, – dedi Shavhat Ótemisov.
Aıta keteıik, buǵan deıin Ortalyq saılaý komıssııasy alǵashqy partııanyń tizimin tirkegenin jazǵanbyz.
