Quryltaı saılaýy: Pragadaǵy qazaqstandyqtardyń 80%-dan astamy daýys berdi
PRAGA. KAZINFORM — Pragadaǵy qazaqstandyqtar Quryltaı saılaýyna belsendi qatysyp jatyr.
Qazaqstannnyń Cheh Respýblıkasyndaǵy elshiligi janynan qurylǵan № 437 saılaý ýchaskesinde Quryltaı saılaýyna daýys berý belsendi ótip jatyr.
Saılaý ýchaskesine Chehııada turaqty nemese ýaqytsha turyp jatqan, bilim alyp, eńbek etip júrgen, sondaı-aq demalys jáne emdelý maqsatymen kelgen Qazaqstan azamattary kelip, óz tańdaýyn jasaýda.
Stýdentterdiń bir bóligi jazǵy kanıkýlda bolǵanyna qaramastan, jastardyń saılaýǵa qatysý belsendiligi joǵary. Ýchaske ókilderiniń aıtýynsha, buǵan deıin Qazaqstan azamattary, onyń ishinde jastar arasynda saılaýǵa qatysý tártibi jóninde aqparattyq-túsindirý jumystary júrgizilgen.
Pragada júrgen Qazaqstan Respýblıkasy Parlamenti Senatynyń VII–VIII shaqyrylymdarynyń depýtaty, memleket jáne qoǵam qaıratkeri Bıbigúl Jeksenbaı da № 437 saılaý ýchaskesinde daýys berdi.
— Elden jyraqta júrsek te, Qazaqstannyń bolashaǵyna qatysty tańdaý jasaý — ár azamattyń konstıtýtsııalyq quqyǵy ári azamattyq jaýapkershiligi. Saıası ınstıtýttar jańarǵanymen, memlekettiń negizgi tiregi — sanaly ári belsendi azamat. Sondyqtan shetelde júrgen otandastarymyzdyń, ásirese jastardyń saılaýǵa belsendi qatysyp jatqanyn kórý qýantady, — dedi Bıbigúl Jeksenbaı.
№ 437 saılaý ýchaskesi komıssııasynyń tóraǵasy daýys berý bastalǵan sátten beri azamattardyń belsendiligi joǵary ekenin atap ótti. Onyń aıtýynsha, saılaýshylardyń ártúrli sanattary, sonyń ishinde stýdentter men jastar saılaý ýchaskesine turaqty kelip jatyr.
Aldyn ala málimet boıynsha, osy ýchaskede daýys berýge tirkelgen Qazaqstan azamattarynyń 80 paıyzdan astamy óz tańdaýyn jasap úlgerdi.
— Biz úshin mańyzdy kórsetkishterdiń biri — jastardyń belsendiligi. Saılaý qarsańynda azamattarǵa daýys berý tártibi men ýchaskeniń jumysy týraly qajetti aqparat berildi. Sonyń nátıjesinde búgin jastardyń da saılaýǵa jaýapkershilikpen qatysyp otyrǵanyn kórip otyrmyz, — dedi № 437 saılaý ýchaskesi komıssııasynyń tóraǵasy.
Aıta keteıik, Pragada daýys berý áli jalǵasady. № 437 saılaý ýchaskesi jergilikti ýaqyt boıynsha saǵat 20:00–ge deıin jumys isteıdi.
Saılaý komıssııasynyń ókilderi daýys berý aıaqtalǵanǵa deıin ýchaskege keletin azamattar sany áli de artýy múmkin ekenin atap ótti.
Buǵan deıin Iordanııadaǵy qazaqstandyq stýdentter saılaýǵa qatysýdyń mańyzy týraly aıtty.
