Quryltaı saılaýy Ortalyq Azııa úshin mańyzdy kezeń — belgııalyq baıqaýshy
ASTANA. KAZINFORM — Qazaqstandaǵy Quryltaı depýtattarynyń alǵashqy saılaýyn halyqaralyq baıqaýshylar da jiti qadaǵalap otyr. Solardyń qatarynda eldegi elektoraldyq úderiske ekinshi ret qatysyp otyrǵan EU Reflect basylymynyń jýrnalısi Derıa Soısal bar. Ol Kazinform tilshisine bergen eksklıýzıvti suhbatynda jýrnalıst óz áserimen bólisti.
— Qazaqstannyń astanasy Astanada bolǵanyma óte qýanyshtymyn. Jýrnalıst retinde saılaýdy baqylaýǵa taǵy da qatysý men úshin úlken mártebe. Munda alǵash ret referendým kezinde bolǵan edim, al qazir jańa bir palataly parlamenttiń saılaýyna qatysyp otyrmyn, — dedi Derıa Soısal.
Ol joǵary ókildi organnyń jańa ataýyna erekshe nazar aýdardy.
— Endi biz «Parlament» emes, «Quryltaı» dep ataımyz. Baıyrǵy túrkilik ári tól qazaq ataýynyń maǵynasy tereń. Ásirese Qazaqstan táýelsizdiginiń 35 jyldyǵy atalyp ótip jatqan tusta bul ataýdyń máni zor. Bul eldiń tolyq táýelsizdigin jáne óziniń tarıhı tamyryna degen maqtanyshyn aıshyqtaıdy, — dep atap ótti jýrnalıst.
Onyń aıtýynsha, halyqaralyq baqylaýdyń aýqymy da áserli. Qazaqstanda 42 elden jáne 13 halyqaralyq uıymnan 777 baıqaýshy jumys istep jatyr. Olardyń qatarynda Belgııa men Shveıtsarııa ókilderi de bar.
— Eýropalyq baıqaýshylardyń saılaýdy baqylaý jáne onyń ótý barysyn qadaǵalaý úshin kelgenin maqtan tutamyn. Bul úlken mártebe, — dedi ol.
Derıa Soısal Quryltaı saılaýyn tek Qazaqstandy ǵana emes, búkil Ortalyq Azııany demokratııalandyrý jolyndaǵy mańyzdy kezeń dep baǵalady.
— Bir palataly parlament zańdardy qabyldaý úderisin jedeldetýge múmkindik beredi. Bul sheshimderdi jedel qabyldaý jáne naqty is-sharalardy júzege asyrý úshin asa mańyzdy. Bolashaq vıtse-prezıdenttiń róli de sheshýshi bolady. Bul óńirdegi basqa elder men postkeńestik memleketter úshin úlgi bolarlyq qadam, — dep esepteıdi belgııalyq jýrnalıst.
Oǵan Qazaqstan Respýblıkasynyń Prezıdenti Qasym-Jomart Toqaevtyń brıfıngi erekshe áser qaldyrǵan.
— Daýys bergennen keıin qazaqstandyq jáne koreılik jýrnalıstermen birge Memleket basshysy suraqtarǵa jaýap bergen brıfıngke qatystym. Prezıdent jastarǵa erekshe mán beriletinin atap ótti. Qazaqstan — jas demokratııa. Al dál osy jas urpaq jańa ıdeıalar ákelip, eldi odan ári nyǵaıtyp, táýelsizdigin kúsheıtedi, — dedi Derıa Soısal.
Ekijaqty qarym-qatynastar týraly sóz qozǵaǵan jýrnalıst olardyń belsendi damyp kele jatqanyn atap ótti.
— Bıyl Belgııa-Qazaqstan baılanystary úshin aıryqsha mańyzdy jyl. Maýsym aıynda Qazaqstan Prezıdenti Brıýsselge baryp, Belgııanyń Premer-mınıstrimen jáne Syrtqy ister mınıstrimen, sondaı-aq Ýrsýla fon der Lıaıenmen jáne Antonıý Koshtamen kezdesti. Al qazanda aralyǵynda Belgııa Koroli Fılıpp Qazaqstanǵa memlekettik saparmen keledi. Bul onyń monarh retinde Ortalyq Azııaǵa jasaıtyn alǵashqy memlekettik sapary. Ol senimdi aımaqtyq seriktes retinde Qazaqstannan bastalmaq, — dedi ol.
Derıa Soısaldyń málimetinshe, búginde Qazaqstanda 120-ǵa jýyq belgııalyq kompanııa jumys isteıdi. Onyń pikirinshe, Korol Fılıpptiń sapary ekonomıkalyq qana emes, akademııalyq saladaǵy, taldaý ortalyqtary deńgeıindegi, sondaı-aq saıası jáne ınstıtýtsıonaldyq baǵyttardaǵy yntymaqtastyqty odan ári nyǵaıta túsedi.
— Koroldiń sapary bizdiń qarym-qatynastarymyzdy odan ári nyǵaıtatynyna senimdimin. Qazaqstan-Belgııa baılanystary jasasyn jáne ǵumyry uzaq bolsyn, — dep qorytyndylady jýrnalıst.
Aıta keteıik, Quryltaı saılaýynda barlyq 7 saıası partııanyń basshysy óz tańdaýyn jasady.
