Quryltaı saılaýy: óndiris oryndarynda jańa saılaý ýchaskeleri ashyldy
ASTANA. KAZINFORM — Aqmola oblysynda 1000-ǵa jýyq jumysshy úshin jańa saılaý ýchaskeleri ashyldy, dep habarlaıdy Ortalyq saılaý komıssııasynyń baspasóz qyzmeti.
13-14 tamyz kúnderi Ortalyq saılaý komıssııasynyń múshesi Ásel Janábilova Aqmola oblysynda ınpektsııalyq saparmen boldy. Іssapar aıasynda memlekettik organdar jáne quqyq qorǵaý qurylymdarymen úılestirý jıyny ótti. Jaýapty organdardyń Quryltaı depýtattaryn saılaýǵa daıyndyq boıynsha esepteri tyńdalyp, aldaǵy kezeńge arnalǵan negizgi mindetter aıqyndaldy. OSK múshesi saılaýdy uıymdastyrý men ótkizýde barlyq memlekettik organdardyń úılesimdi jumysynyń mańyzdylyǵyn atap ótti. Sondaı-aq ol saılaý ýchaskelerin ınternet jelisine turaqty qosylýyn qamtamasyz etýge jáne qajetti ınfraqurylymdy daıyndaýǵa erekshe mán berýdi atap ótti. OSK múshesi saılaýshylardy aqparattandyrý, call-ortalyqtardyń jumysy, daýys berý quqyǵyna arnalǵan esepten shyǵarý kýálikterin alý máselelerine aıryqsha nazar aýdardy.
— Saılaý kúni turǵylyqty jerinen tys jerde bolatyn saılaýshylar daýys berý quqyǵyna arnalǵan esepten shyǵarý kýáligin turaqty tirkelgen jeri boıynsha ýchaskelik saılaý komıssııasynan ala alady. Ol úshin qazirden bastap 22 tamyz kúni saǵat 18:00–ge deıin ótinish berýge bolady. Jazǵy demalys pen kanıkýl kezeńin eskere otyryp, azamattardy esepten shyǵarý kýáligin alý múmkindigi týraly aqparattandyrýdy jalǵastyrý mańyzdy. Osylaısha, saılaýshy basqa eldi mekende bolǵan jaǵdaıda da daýys bere alady, — dep atap ótti Ásel Janábilova.
Saılaýshylarǵa qolaıly jaǵdaı jasaý maqsatynda «Qazaqstan Respýblıkasyndaǵy saılaý týraly» Konstıtýtsııalyq zańǵa úzdiksiz jumys isteıtin óndirisi bar uıymdarda saılaý ýchaskelerin ashýǵa múmkindik beretin ózgeris engizilgenin atap ótken jón. Aqmola oblysynda osyndaı 3 jańa saılaý ýchaskesi ashylyp, olar shamamen 1 000 jumyskerdi qamtıdy. Osy ýchaskelerge barǵan Ásel Janábilova mundaı ýchaskelerdiń ashylýy jumyskerlerdiń ózderiniń konstıtýtsııalyq quqyqtaryn júzege asyrýy úshin qolaıly jaǵdaı jasaý turǵysynan mańyzdy ekendigine erekshe toqtaldy.
Sapar barysynda OSK múshesi daýys berý protsesiniń ınklıýzıvtiligin qamtamasyz etý jáne múgedektigi bar adamdar úshin qajetti jaǵdaılar jasaý máselelerine úlken kóńil bóldi. Taǵy bir mańyzdy baǵyt — kadrlardyń kásibı daıarlyq deńgeıin arttyrý. Ásel Janábilova aýmaqtyq jáne ýchaskelik saılaý komıssııalarynyń 150 múshesine arnalǵan semınarǵa qatysyp, respýblıkalyq kaskadtyq oqytý modeliniń tájirıbe júzinde iske asyrylýymen tanysty.
Sapar barysynda Quryltaı depýtattarynyń alǵashqy saılaýyna daıyndyq jumystarynyń máresine jaqyndaǵany atap ótildi. Negizgi nazar — zańnama talaptaryn qatań túrde saqtaý. Saılaý komıssııalarynyń músheleri azamattardy aqparattandyrý, daýys berý, múgedektigi bar adamdardyń quqyqtaryn qorǵaý, baıqaýshylarmen jáne buqaralyq aqparat quraldarymen ózara is-qımyl jasaý sııaqty barlyq rásimderdi egjeı-tegjeıli pysyqtap jatyr.
Aıta keteıik, Aqmola oblysynda QR Quryltaıynyń depýtattaryn saılaýdy 759 saılaý komıssııasy qamtamasyz etedi, olardyń quramyna 4 520 adam kirdi.
Buǵan deıin Quryltaı saılaýy qarsańynda aqparattyq keńistikte feıkter men arandatýshylyq materıaldardyń taralýy kúsheıgeni habarlandy.
