Quryltaı saılaýy: Mańǵystaýda saılaýshylar tizimi naqtylanyp jatyr
AQTAÝ. KAZINFORM – 23 tamyzda ótetin Qazaqstan Respýblıkasy Quryltaıy depýtattarynyń saılaýyna Mańǵystaý oblysynda daıyndyq jumystary jalǵasyp jatyr.
Oblystyq saılaý komıssııasynyń málimetinshe, óńirde 8 aýmaqtyq saılaý komıssııasy jáne 267 ýchaskelik saılaý komıssııasy jumys isteıdi. Onyń ishinde 255 saılaý ýchaskesi azamattardyń tirkelgen mekenjaıy boıynsha, al 12-si aýrýhanalarda, áskerı bólimderde, óndiristik kásiporyndarda jáne tergeý ızolıatorynda ornalasqan.
Bıyl saılaýshylarǵa qolaıly jaǵdaı jasaý maqsatynda 11 jańa saılaý ýchaskesi ashyldy. Onyń tórteýi Aqtaýda, bireýi Jańaózende, úsheýi Munaıly aýdanynda jáne úsheýi Túpqaraǵan aýdanynda ornalasqan.
Qazirgi tańda Mańǵystaý oblysynda 452 myńnan astam saılaýshy tirkelgen. Onyń ishinde Aqtaýda – 177 315, Jańaózende – 84 672, Munaıly aýdanynda – 90 228 adam daýys berý quqyǵyna ıe. Saılaýshylar tizimin naqtylaý jumystary jalǵasyp jatyr.
Saılaý naýqanyna daıyndyq aıasynda oblystaǵy 1885 saılaý komıssııasy múshesiniń barlyǵy arnaıy oqytýdan ótedi. Oqytý 22 tamyzǵa deıin jalǵasady.
Saılaýdyń ashyqtyǵyn qamtamasyz etý úshin óńirde 7 qoǵamdyq birlestik baqylaýshy retinde akkredıtatsııadan ótken. Budan bólek, Ortalyq saılaý komıssııasy akkredıttegen respýblıkalyq deńgeıdegi 11 qoǵamdyq birlestik pen kommertsııalyq emes uıymnyń baqylaýshylary da saılaý barysyn qadaǵalaı alady.
Sondaı-aq partııalyq tizim usynǵan saıası partııalar árbir saılaý ýchaskesine úsh adamnan aspaıtyn senim bildirilgen ókilderin tirkeýge quqyly. Mańǵystaý oblysyndaǵy 255 turaqty saılaý ýchaskesin eskersek, árbir saıası partııa óńir boıynsha 765 senim bildirilgen adamǵa deıin tirkeı alady.
Buǵan deıin, Aty ańyzǵa aınalǵan akter Djekı Channyń Mańǵystaýǵa kelgenin jazǵan bolatynbyz.
