Quryltaı saılaýy: Londonda daýys berý qalaı ótip jatyr
ASTANA. KAZINFORM — Quryltaı saılaýy kúni syrttaǵy Qazaqstan azamattary daýys berýi úshin 61 shet memlekettegi QR dıplomatııalyq ókildikteri janynan 79 saılaý ýchaskesi jumysqa kirisken edi. Ulybrıtanııadaǵy otandastarymyzdan saılaýda daýys berý tájirıbesi, áseri jáne osy saıası naýqannan kútetin úmiti jóninde suradyq.
Pikir bildirgenderdiń biri — Eýrazııa ulttyq ýnıversıtetiniń oqytýshysy Ásem Qońyrhanova. Ol qazir Ulybrıtanııanyń Lıds qalasynda ǵylymı taǵylymdamadan ótip jatyr. Otandasymyz Quryltaı saılaýynda daýys berý úshin birneshe saǵat jol júrip, Lıdsten Londonǵa arnaıy barǵan.
— Saılaýǵa qatysý — ár azamattyń boryshy, sebebi bul kúni el taǵdyry, urpaq bolashaǵy sheshiledi. Memleketimiz úshin bir tamshy bolsyn úles qosqym keldi. Al saılaýǵa qatysyp jatqan keleshek depýtattardan úlken úmit kútemiz, elimizdiń jan jaqty damýyna at salysyp, halyqtyń senip tapsyryp otyrǵan amanatyna jaýapkershilikpen qaraıdy dep senemiz. Elimizdiń bolashaǵy jarqyn bolsyn dep tileımin! — dedi Ásem.
Taǵy bir Qazaqstan azamaty Ázıma Saparǵalıeva jýyrda Lıds ýnıversıtetinde magıstratýra baǵdarlamasyn aıaqtamaq.
Ol shetelde oqyp, ártúrli ult ókilderimen aralas-quralas bolǵan soń, Qazaqstanǵa degen mahabbaty kúsheıe túskenin aıtady.
— Bizdiń stýdenttik orta halyqaralyq bolǵandyqtan, oqý barysynda álemniń túkpir-túkpirinen kelgen kóptegen jastarmen tanystym. Olardyń arasynda qaýipsizdik sebepterimen óz eline qaıta almaı júrgen nemese múldem turaqty Otany joq azamattar da bar. Olardyń basynan ótken taǵdyryn tyńdaǵan saıyn óz elimniń tynyshtyǵy men táýelsizdigine sheksiz rıza bolyp, maqtanysh sezimi uıalaıdy. Sondyqtan saılaýǵa baryp, el bolashaǵy úshin sheshim qabyldaýǵa qatysý — bul men úshin jaı ǵana azamattyq jaýapkershilik emes, baǵalaı bilýge tıis úlken quqyq pen baqyt. Shetelde júrip daýys berý erekshe tolqynys pen Otanǵa degen jaqyndyqty sezindiredi, — dedi Ázıma.
Sonymen birge, ol saılaýdyń qaı kúni, qaı meken jaıda ótetini aldyn ala habarlanǵanyn atap ótti. Mundaı aqparattar elshiliktiń resmı aqparattyq arnalary men stýdenttik chattarda jarııalanǵan.
— Londondaǵy QR Elshiligi janynan qurylǵan saılaý ýchaskesinde azamattar úshin barlyq qolaıly jaǵdaı jasalǵan: komıssııa músheleri óte sypaıy qarsy alyp, protsestiń jyldam ári ashyq ótýin qamtamasyz etti. Jalpy, bul saılaýdan jáne saılanatyn depýtattardan eldegi saıası mádenıetti odan ári damytyp, jastardyń, onyń ishinde shetelde bilim alyp jatqan mamandardyń áleýetin tıimdi paıdalanýǵa, qoǵamdaǵy naqty máselelerdi sheshýge baǵyttalǵan salmaqty reformalar kútemiz, — dep túıindedi Ázıma.
Bizge pikirin joldaǵan kelesi otandasymyz — Móldir Áshimova. Ol — Qorqyt ata atyndaǵy Qyzylorda ýnıvesıtetiniń Kompıýterlik ǵylymdar boıynsha aǵa oqytýshysy. Búginde Lıds ýnıversıtetinde ǵylymı taǵylymdamadan ótip júr. Ol da daýys berý úshin Londonǵa barǵan.
Otandasymyz Quryltaı saılaýynda shetelde júrip daýys berý patrıottyq sezimin kúsheıtkenin aıtady.
— Men úshin bul saılaýǵa qatysý — eń aldymen azamattyq jaýapkershilik. Shetelde júrsek te, elimizdiń bolashaǵyna qatysty mańyzdy sheshimderge qatysyp, óz tańdaýymyzdy bildirý qajet dep esepteımin. Kámelet jasqa tolǵannan keıin saılaý saıyn ata-anammen birge ózim oqyǵan mekteptegi saılaý ýchaskesine baratynmyn. Sondyqtan búgin Londonda daýys berý men úshin erekshe áserli boldy: arada qansha myń shaqyrym jatsa da, sol tanys dástúr týǵan úımen, ata-anammen jáne elimmen baılanysymdy qaıta sezindirdi. Keıde dál osyndaı qarapaıym sátter qashyqtyqqa qaramastan, ózińdi úıge jaqyn sezindiredi, — dedi ol.
Sonymen qatar, Quryltaıdyń jańa quramynan úlken úmit kútetinin jetkizdi.
— Ǵalym retinde men úshin qabyldanatyn sheshimderdiń ǵylymı zertteýlerge, naqty derekterge jáne sarapshylardyń usynystaryna súıenýi óte mańyzdy. Shetelde ǵylymı ortada júrip, ǵylym men memlekettik saıasattyń ózara baılanysynyń qanshalyqty mańyzdy ekenin jaqsyraq kóresiń, — dedi Móldir.
Odan bólek, Quryltaıǵa saılanatyn depýtattar aımaqtardyń jaǵdaıyna jete mán berse eken degen tilegin bildirdi.
— Sonymen qatar, men ózim óńirden shyqqan azamat retinde aımaqtardyń múddesi iri qalalardyń múddesimen teń dárejede eskerilgenin qalaımyn. Qazaqstannyń damýy tek megapolıstermen ólshenbeýi kerek. Óńirlerde de myqty mamandar, talantty jastar, ǵalymdar men kásipkerler bar. Sondyqtan jańa depýtattar óńirlerdegi bilim, ǵylym, ınfraqurylym, ekologııa jáne jastarǵa arnalǵan múmkindikterge erekshe nazar aýdarsa eken deımin, — dep túıindedi otandasymyz.
Aıta keteıik, buǵan deıin qazaqstandyqtar Máskeýdegi Quryltaı saılaýynda belsendi daýys berip jatqanyn jazǵanbyz.
