Quryltaı saılaýy kúni jalpyulttyq onlaın-marafon ótip jatyr
ASTANA. KAZINFORM — Búgin el tarıhynda alǵash ret Quryltaı saılaýy ótip jatqan kúni jalpyulttyq onlaın-marafon óz jumysyn bastady.
Aýqymdy medıajoba saılaý barysy týraly jan-jaqty aqparat berýge, sondaı-aq qoǵamdyq ómirdiń ózekti máselelerin talqylaýǵa baǵyttalǵan.
Tikeleı efır saǵat 09:00–de bastalyp, túngi 00:30–ǵa deıin jalǵasady. 16 saǵat boıy kórermenderge saılaý protsesiniń barysy týraly jedel aqparat, sarapshylardyń pikirleri, tikeleı qosylymdar, arnaıy reportajdar men túrli formattaǵy baǵdarlamalar usynylady.
Marafonǵa qoǵam qaıratkerleri, belsendi azamattar, túrli salanyń mamandary men sarapshylary, buqaralyq aqparat quraldarynyń ókilderi, blogerler, sportshylar, sondaı-aq shyǵarmashylyq jáne kreatıvti ındýstrııa ókilderi qatysyp jatyr.
Onlaın-marafonnyń mazmuny birneshe arnaıy alańda usynylady. Negizgi sahnada qoǵam úshin ózekti máseleler talqylanyp, spıkerler óz pikirleri men ustanymdaryn bildiredi. Touch Screen ınteraktıvti júıesi arqyly kórermenderge Qazaqstannyń túrli baǵyttar boıynsha halyqaralyq reıtıngterdegi kórsetkishteri, sondaı-aq eldiń negizgi statıstıkalyq derekteri tanystyrylady.
Saılaý naýqanyn jan-jaqty jarııalaýǵa erekshe nazar aýdarylǵan. AQSh, Reseı, Túrkııa, Qytaı jáne Belgııadan, sondaı-aq Qazaqstannyń barlyq óńirlerinen tikeleı qosylymdar uıymdastyryldy. Ár eki saǵat saıyn kórermenderge sheteldegi daýys berý nátıjeleri týraly aqparat usynylady.
Saılaý barysy týraly resmı aqparat eki alańnan beriledi. Ortalyq saılaý komıssııasynyń alańynda resmı statıstıkalyq málimetter men daýys berý barysy týraly aqparat jarııalanady. Al Ortalyq kommýnıkatsııalar qyzmetiniń alańynda halyqaralyq baıqaýshylardyń pikirleri men baǵalaýlary usynylady.
Marafon baǵdarlamasyna tanymdyq jáne motıvatsııalyq formattar da engizilgen. Kúni boıy óz salasynda jetistikke jetken azamattar men qoǵamdyq belsendiler 5–7 mınýttyq shaǵyn dárister barysynda óz tájirıbelerimen bólisedi.
Dıskýssııalyq alańda qoǵamdyq-saıası, áleýmettik-ekonomıkalyq jáne tarıhı-mádenı taqyryptar talqylanady. «Ekspress-kamera» formaty arqyly kórermenderdiń saýaldary jedel jınaqtalyp, qysqa suhbattar júrgizilip, azamattardyń pikirleri usynylady. Sonymen qatar marafon aıasynda vıktorınalar men oıyn-saýyq formatyndaǵy is-sharalar uıymdastyrylady.
Marafonnyń taǵy bir baǵyty — «Qarqyndy qurylys» jobasy. Onyń aıasynda tilshiler el aýmaǵynda salynyp jatqan mańyzdy nysandardan arnaıy reportajdar daıyndap, qurylys jumystarynyń aýqymyn kórsetedi.
Marafon barysynda Astana, Almaty jáne Shymkent qalalarynan tikeleı qosylymdar uıymdastyrý josparlanǵan. Kórermender úsh megapolıstiń tynys-tirshiligimen tanysyp, qalalardyń kórikti jerlerinen reportajdardy tamashalaıdy. Sondaı-aq turǵyndarmen jáne túrli salalardyń ókilderimen suhbattar usynylady.
Jalpyulttyq onlaın-marafon — qoǵamdy Quryltaı saılaýynyń barysy týraly keń kólemde aqparattandyrýǵa jáne ózekti qoǵamdyq, áleýmettik, ekonomıkalyq ári mádenı máselelerdi talqylaýǵa arnalǵan aýqymdy medıajoba.
Medıajoba tek saılaý protsesin jarııalaýmen shektelmeıdi. Efır barysynda qoǵamdyq ómirdiń ózekti máseleleri talqylanyp, sarapshylar men qoǵam qaıratkerleri óz pikirlerin bildiredi. Kórermenderge eldegi negizgi reformalar tanystyrylyp, shetelden qaıtarylǵan mıllıardtardyń qaı baǵyttarǵa jumsalyp jatqany týraly aqparat beriledi. Zańnyń is júzinde qalaı jumys isteıtini jáne tsıfrlyq qaýipsizdiktiń ne sebepti ár azamatqa qatysty ekeni de talqylanady.
Jalpyulttyq onlaın-marafon respýblıkalyq jáne óńirlik medıaresýrstardyń resmı saıttary men áleýmettik jelidegi paraqshalarynda tikeleı efırde kórsetiledi. Іs-shara barysynda jedel jańalyqtar men mańyzdy aqparat «Onlaın-marafon — 2026» Telegram-arnasynda jarııalanyp otyrady.
Jalpyulttyq onlaın-marafonnyń tikeleı efırin 38 YouTube arnasynan, onyń ishinde 14 respýblıkalyq jáne 14 óńirlik telearnanyń YouTube arnalarynan, sondaı-aq 10 aqparattyq portaldan kórýge bolady.
Aıta ketelik Quryltaı saılaýy kúni 16 saǵattyq jalpyulttyq online-marafon ótetini týraly jazǵan edik.
