Quryltaı saılaýy kúni 16 saǵattyq jalpyulttyq online-marafon ótedi
ASTANA. KAZINFORM – 23 tamyzda ótetin Quryltaı saılaýy kúni «Qazaqstan» respýblıkalyq teleradıokorporatsııasynyń uıymdastyrýymen aýqymdy medıajoba – jalpyulttyq online-marafon ótedi. Tikeleı efır saǵat 09:00-den túngi 00:30-ǵa deıin jalǵasady, dep habarlaıdy Kazinform.
El tarıhynda tuńǵysh ret ótetin Quryltaı saılaýyna arnalǵan medıajoba barysynda qoǵamdaǵy ózekti taqyryptar talqylanyp, saılaý barysynan úzdiksiz aqparat beriledi. Oǵan qoǵam qaıratkerleri, belsendi azamattar, óz salasynda jetistikke jetken mamandar, BAQ ókilderi, sarapshylar, blogerler, sportshylar men óner juldyzdary qatysady.
Іs-shara aıasynda birneshe alań jumys isteıdi. Basty sahnada túrli taqyryp boıynsha spıkerler oı bólisedi. Touch Screen arqyly negizgi statıstıkalyq málimetter men Qazaqstannyń ár sala boıynsha halyqaralyq kórsetkishteri usynylady. Ár eki saǵat saıyn menshikti tilshiler sheteldegi daýys berý barysy týraly baıandaıdy.
– Brıfıng alańynda Ortalyq kommýnıkatsııalar qyzmetiniń uıymdastyrýymen sheteldik baqylaýshylar jáne QR Ortalyq saılaý komıssııasy naýqanǵa qatysty resmı aqparattardy jarııalaıdy. Óz salasynda jetistikke jetken tulǵalar men qoǵam belsendileri 5-7 mınýttyq motıvatsııalyq jáne tanymdyq dárister oqıdy. Dıskýssııa alańynda qoǵamdyq-saıası, áleýmettik-ekonomıkalyq, tarıhı-mádenı taqyryptar boıynsha pikirtalastar uıymdastyrylady, – delingen habarlamada.
Ekspress-kamerada jedel pikirler men qysqa suhbattar beriledi. Sonymen qatar vıktorına jáne túrli oıyn-saýyq sharalary qarastyrylǵan.
«Qarqyndy qurylys» jobasy aıasynda el aýmaǵynda salynyp jatqan aýqymdy nysandardyń qurylys alańdarynan tilshiler arnaıy habar taratady.
Marafonnyń basty erekshelikteriniń biri – Astana, Almaty jáne Shymkent qalalarynan tikeleı qosylymdardyń uıymdastyrylýy. Efır barysynda úsh megapolıstiń tynys-tirshiligi kórsetilip, qalalardyń kórikti jerlerinen reportajdar, turǵyndarmen jáne túrli sala ókilderimen suhbattar usynylady.
Jalpyulttyq online-marafon respýblıkalyq jáne aımaqtyq medıa resýrstardyń resmı saıttary men áleýmettik jelilerinde tikeleı kórsetiledi. Marafonǵa qatysty jedel jańalyqtar men mańyzdy aqparattar «Onlaın marafon – 2026» Telegram arnasynda jarııalanyp otyrady.
Aıta keteıik, 23 tamyzda saılaý ýchaskelerinde onlaın tirkeý servısteri iske qosylady.
