Quryltaı saılaýy kúni 16 saǵattyq jalpyulttyq online-marafon ótedi
ASTANA.KAZINFORM — Marafon tikeleı efırde saǵat 09:00-den túngi 00:30-ǵa deıin jalǵasady.
23 tamyzǵa belgilengen Quryltaı saılaýy kúni «Qazaqstan» respýblıkalyq teleradıokorporatsııasynyń uıytqy bolýymen aýqymdy medıajoba – jalpyulttyq online-marafon ótedi.
El tarıhynda tuńǵysh ret ótetin Quryltaı saılaýyna arnalǵan medıajoba barysynda qoǵamdaǵy ózekti taqyryptar talqylanyp, saılaý barysynan úzdiksiz aqparat beriledi. Oǵan qoǵam qaıratkerleri, belsendi azamattar, óz salasynda jetistikke jetken mamandar, BAQ ókilderi, sarapshylar, blogerler, sportshylar men óner juldyzdary qatysady.
Іs-shara aıasynda birneshe alań jumys isteıdi. Basty sahnada túrli taqyryp boıynsha spıkerler oı bólisedi. Touch Screen arqyly negizgi statıstıkalyq málimetter men Qazaqstannyń ár sala boıynsha halyqaralyq kórsetkishteri usynylady. Ár 2 saǵat saıyn menshikti tilshiler sheteldegi daýys berý nátıjelerin baıandaıdy.
Brıfıng alańynda Ortalyq kommýnıkatsııalar qyzmetiniń uıymdastyrýymen sheteldik baqylaýshylar jáne QR OSK naýqanǵa qatysty resmı aqparattardy jarııalaıdy. Óz salasynda jetistikke jetken tulǵalar men qoǵam belsendileri 5-7 mınýttyq motıvatsııalyq jáne tanymdyq dárister oqıdy. Dıskýssııa alańynda qoǵamdyq-saıası, áleýmettik jáne ekonomıkalyq, tarıhı-mádenı taqyryptar boıynsha pikirtalastar uıymdastyrylady. Ekspress-kamerada jedel pikirler men qysqa suhbattar beriledi. Sonymen qatar vıktorına jáne ártúrli oıyn-saýyqtyq sharalar qarastyrylǵan.
«Qarqyndy qurylys» jobasy aıasynda el aýmaǵynda júrip jatqan aýqymdy nysandardyń alańdarynan tilshiler arnaıy habar taratady.
Marafonnyń basty ereksheligi – Astana, Almaty jáne Shymkent qalalarynan tikeleı qosylymdar uıymdastyrylady. Efır barysynda úsh megapolıstiń tynys-tirshiligi kórsetilip, qalalardyń kórikti jerlerinen reportajdar, turǵyndarmen jáne túrli sala ókilderimen suhbattar usynylady.
Jalpyulttyq online-marafon respýblıkalyq jáne aımaqtyq medıa resýrstrdyń resmı saıttary men áleýmettik jelilerinde tikeleı kórsetiledi. Marafonǵa qatysty jedel jańalyqtar, mańyzdy aqparattar «Onlaın marafon – 2026» Telegram arnasynda jarııalanyp otyrady.
Aıta keteıik, qazaqstandyqtardyń 73,8%-y Quryltaı saılaýynda daýys berýge nıetti.
Jalpy elimiz boıynsha 12 mln 600 myńnan astam saılaýshy tirkeldi.
