Quryltaı saılaýy: Qostanaıdaǵy 6697 áskerı bóliminde saılaý qalaı ótip jatyr
ASTANA. KAZINFORM — Qostanaıdaǵy QR Ulttyq ulanynyń 6697 áskerı bóliminde ornalasqan № 27 saılaý ýchaskesinde 300-den astam áskerı qyzmetshi daýys berip jatyr. Kóptegen sarbaz úshin bul ómirindegi alǵashqy saılaý. Ýchaskedegi saılaýshylardyń 40 paıyzdan astamy alǵash ret daýys berdi.
Tańerteńnen beri 6697 áskerı bólimindegi áskerı qyzmetshiler № 27 saılaý ýchaskesine kezek-kezek kirip, bıýlletenderin alyp, daýys berý kabınalaryna ótip jatyr.
Áskerı bólimde daýys berý rásimi basqa ýchaskelerdegideı ótedi. Kireberiste komıssııa músheleri men baıqaýshylar tur. Odan keıin qujattar tekserilip, bıýlleten beriledi jáne saılaýshy jasyryn daýys berý kabınasyna kiredi. Áskerı qyzmetshiler uıymdasqan túrde kelgendikten, uzyn-sonar kezek baıqalmaıdy.
Ýchaskede barlyǵy 300-den astam adam daýys beredi. Bul ýchaskedegi erekshelik munda alǵash ret daýys berip otyrǵan jastar kóp.
№ 27 saılaý ýchaskesiniń tóraǵasy, QR Ulttyq ulanynyń 6697 áskerı bóliminiń tárbıe jáne áleýmettik-quqyqtyq jumystar jónindegi orynbasary Eskendir Saraýbekovtiń aıtýynsha, alǵash ret daýys berip jatqandardyń basym bóligi — 18 jasqa tolǵan merzimdi áskerı qyzmetshiler.
— Merzimdi áskerı qyzmetshilerimiz saılaýǵa belsendi qatysyp jatyr. 40 paıyzdan astamy alǵash ret daýys berýde. Alǵash ret daýys berip otyrǵandarǵa «Ulttyq ulan» jáne «Quryltaı-2026» degen jazýy bar bloknottardy estelik syılyq retinde daıyndadyq, — dedi Eskendir Saraýbekov.
Búgin alǵash ret bıýlleten alǵandardyń biri — merzimdi áskerı qyzmetshi Amanbek Jandos. Ol Aqmola oblysynyń týmasy jáne bıyl merzimdi áskerı qyzmetke shaqyrylǵan.
— Búgin alǵash ret daýys berip otyrmyn. Sondyqtan bul men úshin erekshe ári tolqynysqa toly sát. Men óz daýysym arqyly ustanymymdy bildirip, elimizdiń bolashaǵyna óz úlesimdi qosa alatynymdy túsinemin. Azamat retinde shet qalmaı, jaýapkershiligimdi seziný men úshin mańyzdy, — dedi áskerı qyzmetshi.
Janynda basqa da sarbazdar daýys berip jatyr. Olardyń keıbiri úshin saılaýǵa qatysý áskerı qyzmetimen tuspa-tus keldi.
— Men úshin daýys berýge qatysý — eń aldymen azamattyq jaýapkershilik. Áskerı qyzmet tártip pen borysh sezimin qalyptastyrady. Búgin árqaısymyz eldiń bolashaǵyna óz úlesimizdi qosa alatynymyzdy erekshe sezindim. Áserim jaqsy, barlyǵy tynysh ári uıymdasqan túrde ótip jatyr, — dedi 19 jastaǵy merzimdi áskerı qyzmetshi Dıas Abılqasov.
Jas sarbazdar úshin búgingi kúndi erekshe ótkizý josparlanǵan. Daýys bergennen keıin áskerı qyzmetshilerge merekelik túski as uıymdastyrylyp, shaǵyn kontsert pen basqa da merekelik sharalar ótedi.
— Búgin qatysyp jatqan Quryltaı elimiz úshin shyn máninde tarıhı oqıǵa dep oılaımyn. Qazaqstan mańyzdy ózgerister qarsańynda tur: qos palataly júıeniń ornyna bir palataly júıe keledi. Bul ózgerister elimizdiń odan ári damýyna yqpal etip, túptep kelgende oń nátıjesin beredi dep senemin, — dedi Eskendir Saraýbekov.
Saılaý rásimderiniń saqtalýyn komıssııa músheleri men baıqaýshylar baqylap otyr. Jalpy baqylaý júrgizý úshin áskerı bólimge «Ortalyq» óńirlik qolbasshylyǵy qolbasshysynyń tyl jónindegi orynbasary, polkovnık Adlet Kórkembaev ta keldi.
Áskerı qyzmetshiler ýrnaǵa birinen soń biri kelip, daýys berýdi jalǵastyryp jatyr. Biri úshin bul saılaýǵa kezekti qatysý bolsa, ondaǵan jas sarbaz úshin áskerı qyzmet kezinde bıýlleten alyp, ómirindegi alǵashqy tańdaýyn jasaýǵa múmkindik bolyp otyr.
Eske salsaq, bıyl 1 shildede Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy.
Aıta keteıik, buǵan deıin Tokıo, Seýldegi qazaqstandyqtar daýys berýdi bastady.
