Quryltaı saılaýy: Qyzylordada kreatıvti aqparattyq quraldar qoldanyla bastady
QYZYLORDA. KAZINFORM — QR Ortalyq saılaý komıssııasy ázirlegen biryńǵaı úlgidegi aqparattyq bannerler Qyzylorda qalasy men aýdandardaǵy ortalyq kóshelerge, halyq kóp shoǵyrlanatyn oryndarǵa ornalastyryla bastady. Bul týraly oblystyq aýmaqtyq saılaý komıssııasy habarlady.
Sonymen qatar turǵyndardy Quryltaı saılaýy jóninde keńinen aqparattandyrý maqsatynda zamanaýı ári kreatıvti aqparattyq quraldar paıdalanylady.
— Atap aıtqanda, halyq kóp shoǵyrlanatyn 50 qoǵamdyq kólik aıaldamasyna dıodty jaryq shamdary bar bannerler ornatyldy. Qala aýmaǵynda qatynaıtyn avtobýstardyń ishinde 200 aqparattyq flaer qoıylady. Sonymen qatar saýda nysandarynyń LED ekrandarynda, Qyzylorda áýejaıy men avtovokzalynda, sondaı-aq halyqqa qyzmet kórsetý ortalyǵynda aýdıo jáne beınerolıkterdiń turaqty rotatsııasy júrgizilip keledi, — delingen habarlamada.
Qalanyń kórikti nysandarynyń biri sanalatyn dóńgelek sholý attraktsıonynan Quryltaı saılaýyna arnalǵan beınerolıkterdi tamashalaýǵa bolady.
Al buǵan deıin Quryltaı saılaýyna baılanysty Qyzylorda oblysynda jedel áreket etý ortalyǵynyń 109 biryńǵaı baılanys ortalyǵy dıspetcherlik qyzmetin bastady.
