Quryltaı saılaýy: Qyrǵyzstandaǵy qazaqstandyqtar daýys berip jatyr
ASTANA.KAZINFORM - Bishkektegi Qazaqstan Respýblıkasynyń elshiliginde bir palataly Quryltaı saılaýyna daýys berý júrip jatyr.
Dıplomatııalyq mıssııa ǵımaratynda ornalasqan №428 ýchaskelik saılaý komıssııasy jergilikti ýaqyt boıynsha tańǵy saǵat 7:00-de jumysyn bastady.
Elshilik málimetinshe, konsýldyqta turaqty tirkelgen 200 qazaqstandyq saılaýshy tizimge engizilgen.
Alǵashqy saılaýshylar saılaý ýchaskesine tańerteń erte kele bastady, onyń ishinde resmı maqsattarmen Qyrǵyzstanda ýaqytsha turatyn saılaýshylar da bar.
Bishkekke barǵan otandasymyz Tatıana Tsoı daýys berýge árqashan belsendi qatysatynyn aıtty.
-Men bul jaqqa Astanadan jaqyndaryma qonaqqa keldim. Saılaý ýchaskesine daýys berýge keldim, sebebi bul meniń azamattyq paryzym. Biz elimizdiń bolashaqta júretin jolyn tańdap jatyrmyz, - dedi ol.
Astanalyq ALEM zamanaýı bı teatrynyń jas bıshisi Aıza Bekálı VI Dúnıejúzilik kóshpendiler oıyndarynyń ashylý saltanatyna qatysý úshin Qyrǵyzstanda ýaqytsha júrgenin, sóıte tura azamattyq boryshyn óteý úshin saılaýǵa kelgenin aıtty.
-Bizdiń Qyrǵyzstanda jatqanymyzǵa bir aı. Búgin men Quryltaı saılaýyna daýys berý úshin Qyrǵyz Respýblıkasyndaǵy Qazaqstan elshiliginiń saılaý ýchaskesine keldim. Elimizdiń patrıoty retinde men azamattyq boryshymdy óteýdi mańyzdy qadam dep sanaımyn, sebebi elimizdiń bolashaǵy bizdiń daýysymyzǵa baılanysty. Qazaqstan jastary - elimizdiń bolashaǵy, - dep atap ótti ol.
Ýchaskelik saılaý komıssııasynyń quramynda TMD-ǵa múshe memleketterdiń Parlamentaralyq Assambleıasynan eki halyqaralyq baıqaýshy, sondaı-aq BAQ ókilderi bar.
Kámeletke tolǵan ár qazaqstandyq saılaýda daýys berýge quqyly. Daýys berý jergilikti ýaqyt boıynsha saǵat 20:00-ge deıin jalǵasady, sodan keıin saılaý ýchaskesi komıssııasynyń músheleri daýystardy sanaýǵa kirisedi.
Buǵan deıin Quryltaı saılýynda Reseıdegi Qazaqstan azamattary daýys berip jatqanyn habarladyq.
