Quryltaı saılaýy qarsańynda tanymal tulǵanyń atynan jalǵan úndeý tarady
ASTANA. KAZINFORM - Jalǵan aqparatqa qarsy is-qımyl ortalyǵy buǵan deıin Quryltaı depýtattaryn saılaý aldyndaǵy úgit naýqany kezeńinde jalǵan aqparat pen manıpýlıatsııalyq kontenttiń taralý qaýpi artýy múmkin ekenin eskertken bolatyn.
Qazirgi ýaqytta áleýmettik jelilerde qazaqstandyq tanymal tulǵanyń beınesi paıdalanylǵan jalǵan jarııalanymnyń taralyp jatqany anyqtaldy. Onda azamattar saıası partııalardyń birin qoldaýǵa jáne buqaralyq is-sharaǵa qatysýǵa shaqyrylǵan. Sonymen qatar, atalǵan tulǵanyń atynan saıası partııany qoldaǵany úshin aqshalaı syıaqy beriletini týraly jalǵan ýádeler tarap jatyr.
Jarııalanymda aty atalǵan tulǵanyń ózi bul aqparatty resmı túrde teriske shyǵaryp, oqyrmandaryna onyń jalǵan ekenin málimdedi. Ortalyq azamattardyń saılaý zańnamasynyń negizgi talaptaryn bilýiniń mańyzdylyǵyna nazar aýdarady. Kóp jaǵdaıda zań talaptarynyń óreskel buzylýy osyndaı manıpýlıatsııalardy birden tanýǵa múmkindik beredi.
-Saılaý aldyndaǵy úgitti júzege asyrý qaǵıdalaryna sáıkes azamattyń beınesin onyń jazbasha kelisiminsiz úgit materıaldarynda paıdalanýǵa tyıym salynady. Sonymen qatar, Qazaqstan Respýblıkasynyń «Saılaý týraly» Zańyna sáıkes kandıdatty nemese saıası partııany qoldaý úshin aqshalaı tólemder, taýarlar, qyzmetter, qaıyrymdylyq kómek, lotereıalar ne ózge de materıaldyq ıgilikterdi ýáde etý arqyly saılaý aldyndaǵy úgit-nasıhatty júrgizýge tyıym salynady. Sondaı-aq, taralyp jatqan jarııalanym ótkizilýi resmı túrde rastalmaǵan buqaralyq is-sharaǵa qatysýǵa shaqyrady. Ruqsat etilmegen buqaralyq is-sharalarǵa qatysý Qazaqstan Respýblıkasynyń zańnamasyna sáıkes jaýaptylyqqa ákep soǵýy múmkin,-delingen habarlamada.
Esterińizge sala keteıik, saılaý aldyndaǵy úgit Qazaqstan Respýblıkasynyń zańnamasynda belgilengen tártippen jáne tek ýákiletti sýbektiler arqyly júzege asyrylady.
Azamattardy mundaı jarııalanymdarǵa syn turǵysynan qaraýǵa shaqyramyz. Eger taratylyp jatqan aqparat zań talaptaryna anyq qaıshy kelse, saıası qoldaý úshin aqshalaı syıaqy ýáde etse nemese tanymal tulǵalardyń beınesin olardyń kelisiminsiz paıdalansa, onyń shynaıylyǵyna kúmándanýǵa tolyq negiz bar.
-Saılaý naýqanynyń barysy týraly aqparatty tek resmı derekkózderden alyp, tekserilmegen habarlamalardy taratpańyz,-dep málimdedi ortalyqtan.
Osyǵan deıin Quryltaı saılaýy aldynda jalǵan akkaýnttar men feık aqparat kóbeıgeni týraly jazdyq.
