Quryltaı saılaýy qarsańynda Qyzylordada biryńǵaı baılanys ortalyǵynyń dıspetcherlik qyzmeti iske qosyldy
QYZYLORDA. KAZINFORM — 23 tamyz kúni ótetin Quryltaı saılaýyna baılanysty Qyzylorda oblysynda jedel áreket etý ortalyǵynyń 109 biryńǵaı baılanys ortalyǵy dıspetcherlik qyzmetin bastady. Bul týraly oblystyq aýmaqtyq saılaý komıssııasy habarlady.
109 qyzmeti árbir saılaý jáne referendým naýqany kezinde daýys berýshi azamattar úshin yńǵaıly, operatıvti ári qoljetimdi kommýnıkatsııa alańyna aınalady.
— Bizdiń ortalyq saılaýshylardyń saýalyna ýaqytyly ári sapaly jaýap beretin senimdi platforma bolyp sanalady. Qazirdiń ózindn turǵyndardan Quryltaı saılaýyna qatysty qońyraýlar túse bastady. Biz árbir qońyraý úshin jaýaptymyz. Sebebi saıası naýqanda árbir azamattyń daýysy mańyzdy, — dedi mekeme dırektory Baǵlan Terlikbaev.
4 aýysymmen jumys isteıtin 28 dıspetcher Quryltaı kezinde qurylǵan ýchaskeler týraly, meken-jaı jáne komıssııalardyń quramy sekildi aqparatty túsindirýge daıyn. Sonymen birge onlaın platformalardyń kómegimen azamattardyń qaı ýchaskede tirkelgenin anyqtap bere alady. Oblystyq aýmaqtyq saılaý komıssııasynyń múshesi Abaı Taǵybergen baılanys ortalyǵynyń operatorlaryna aqparattyq semınar ótip, mańyzdy naýqandaǵy basty erekshelikterdi túsindirdi.
Aıta keteıik, Quryltaı saılaýynda azamattar 23 tamyz kúni saǵat 07.00-den 20.00-ge deıin daýys bere alady.
Daýys berý kúni óz ýchaskesinde bolmaıtynyn 7 tamyzdan bastap ótinish qaldyrý arqyly habarlap, esepten shyǵarý kýáligin ala alady.
Al búginde Qyzylorda óńirinde 9 aýmaqtyq, 386 ýchaskelik saılaý komıssııasy jumys isteıdi.
