Quryltaı saılaýy: «Baıtaq» jasyldar partııasynyń tizimi tirkeldi
ASTANA. KAZINFORM — Qazaqstan Respýblıkasy Ortalyq saılaý komıssııasy «Baıtaq» jasyldar partııasy qoǵamdyq birlestiginiń partııalyq tizimin tirkedi.
OSK múshesi Azamat Aımanaqumovtyń aıtýynsha, partııa 47 adamnan turatyn partııalyq tizimdi usynǵan.
— Ortalyq saılaý komıssııasynyń suraýy boıynsha ýákiletti memlekettik organdar partııalyq tizimge engizilgen kandıdattardyń Konstıtýtsııa men «Qazaqstan Respýblıkasyndaǵy saılaý týraly» Konstıtýtsııalyq zań talaptaryna sáıkestigin tekserdi. Partııalyq tizimdegi 18 kandıdat — áıelder, jastar jáne múmkindigi shekteýli adamdar. Olardyń úlesi — 38,3 paıyz, belgilengen kvota saqtalǵan. Partııalyq tizimge engizilgen kandıdattardyń barlyǵy Konstıtýtsııa jáne «Qazaqstan Respýblıkasyndaǵy saılaý týraly» Konstıtýtsııalyq zań talaptaryna sáıkes keledi, — dedi Azamat Aımanaqumov.
Onyń málimetinshe, Parlament Májilisi depýtattarynyń aldyńǵy saılaýynda saılaýshylar daýysynyń 1-3 paıyzy aralyǵynda daýys jınaǵan saıası partııalar saılaý jarnasynyń 70 paıyzyn tóleıdi.
— «Baıtaq» jasyldar partııasy Parlament Májilisiniń segizinshi shaqyrylymy depýtattaryn saılaýda 2,3 paıyz daýys alǵan. Osyǵan baılanysty partııa zańnamaǵa sáıkes saılaý jarnasynyń 70 paıyzy mólsherindegi jarnany tóledi, — dedi OSK múshesi.
Ortalyq saılaý komıssııasynyń sheshimimen «Baıtaq» jasyldar partııasynyń partııalyq tizimi tirkeldi.
Buǵan deıin Ortalyq saılaý komıssııasy Quryltaı depýtattaryn saılaýǵa qatysatyn «Qazaqstan halyq partııasynyń» partııalyq tizimin tirkedi.
