Quryltaı saılaýy: «Aýyl» partııasynyń tizimi tirkeldi
ASTANA. KAZINFORM — Ortalyq saılaý komıssııasy «Aýyl» partııasynyń partııalyq tizimin tirkedi. Bul týraly Ortalyq saılaý komıssııasynyń hatshysy Shavhat Ótemisov málim etti.
Onyń aıtýynsha, «Aýyl» partııasy 69 adamnan turatyn partııalyq tizimdi usynǵan.
— Ortalyq saılaý komıssııasy jibergen saýalǵa sáıkes ýákiletti memlekettik organdar Quryltaı depýtattyǵyna saılaný úshin partııalyq tizimge engizilgen azamattardyń Konstıtýtsııa men «Qazaqstan Respýblıkasyndaǵy saılaý týraly» Konstıtýtsııalyq zań talaptaryna sáıkestigin tekserdi, — dedi Shavhat Ótemisov.
OSK hatshysynyń málimetinshe, partııalyq tizimdegi 29 kandıdat áıelder, jastar jáne múgedektigi bar adamdar sanatyna jatady. Bul tizimniń 42 paıyzyn quraıdy jáne zańnamada belgilengen kvota talaptary tolyq saqtalǵan.
— Partııalyq tizimge engizilgen barlyq azamat Konstıtýtsııanyń jáne saılaý týraly Konstıtýtsııalyq zańnyń talaptaryna sáıkes keledi, — dedi ol.
Sondaı-aq Shavhat Ótemisov saılaý jarnasyna qatysty zań normasyn túsindirdi.
— «Saılaý týraly» Konstıtýtsııalyq zańnyń 88-babynyń 2-tarmaǵyna sáıkes, Parlament Májilisi depýtattarynyń aldyńǵy saılaýynda daýys berýge qatysqan saılaýshylardyń keminde bes paıyz daýysyn jınaǵan saıası partııalar saılaý jarnasyn tóleýden bosatylady, — dedi ol.
Onyń aıtýynsha, «Aýyl» partııasy Parlament Májilisiniń segizinshi shaqyrylymy depýtattarynyń saılaýynda 10,90 paıyz daýys jınaǵan. Osyǵan baılanysty partııa saılaý jarnasyn tólemeıdi.
Keshe «Baıtaq» jasyldar partııasynyń tizimi tirkeldi.
