Quryltaı saılaýy aldyndaǵy úgit-nasıhat naýqany bastaldy
ASTANA. KAZINFORM — QR Ortalyq saılaý komıssııasy Quryltaı saılaýyna qatysatyn jeti saıası partııanyń barlyǵynyń partııalyq tizimderin tirkedi. 145 depýtattyq mandatqa 545 kandıdat úmitker bolyp otyr.
1 shildede Ortalyq saılaý komıssııasy Quryltaı saılaýyna qatysatyn saıası partııalardyń tizimin bekitti. Olardyń qatarynda «Aq jol» demokratııalyq partııasy, «Aýyl» partııasy, «Ádilet» saıası partııasy, Jalpyulttyq sotsıal-demokratııalyq partııasy, Qazaqstannyń «Baıtaq» jasyldar partııasy, Qazaqstan halyq partııasyn jáne «Respublica» partııasy bar.
13 shilde saǵat 18:00–degi jaǵdaı boıynsha komıssııaǵa atalǵan jeti saıası partııanyń barlyǵynyń partııalyq tizimderi kelip tústi. Osydan keıin qujattar partııalyq tizimge engizilgen azamattardyń Konstıtýtsııanyń 35-baby 3-tarmaǵy, 54-baby 3-tarmaǵy jáne konstıtýtsııalyq zańnyń 4-babynda belgilengen talaptarǵa sáıkestigin tekserý úshin ýákiletti memlekettik organdarǵa joldandy.
Tekserý aıaqtalǵannan keıin Ortalyq saılaý komıssııasy zańnama talaptaryna sáıkes keletin kandıdattardy tirkedi.
Tirkeý qorytyndysy boıynsha eń kóp kandıdat usynǵan partııa — «Ádilet». Onyń tizimine 186 kandıdat engizildi, ıaǵnı tirkelgen barlyq úmitkerdiń úshten birinen asady. Odan keıin Respublica — 75 kandıdat, Qazaqstannyń Halyq partııasy — 72, «Aýyl» — 69, «Aq jol» — 63, «Baıtaq» — 47 jáne Jalpyulttyq sotsıal-demokratııalyq partııa — 33 kandıdat usyndy.
Partııalyq tizimderde depýtattar, kásipkerler, qoǵam qaıratkerleri, sportshylar, jýrnalıster, ekologter, dárigerler, muǵalimder, ınjenerler, zańgerler, sondaı-aq bilim, ǵylym, medıtsına, mádenıet, IT jáne memlekettik sektor ókilderi bar.
Tirkelgen barlyq partııalyq tizimde áıelder, jastar jáne múgedektigi bar adamdar úshin belgilengen 30 paıyzdyq kvota saqtalǵan. Al Ortalyq saılaý komıssııasy bul talap tek partııalyq tizimderdi jasaý kezinde ǵana emes, depýtattyq mandattardy bólý barysynda da oryndalýy tıis ekenin eske salǵan bolatyn.
Jastardyń, múgedektigi bar adamdardyń jáne áıelderdiń eń joǵary úlesi Respublica partııasynyń tiziminde tirkelgen — 50,7% (38 adam). Odan keıin «Ádilet» — 47,3% (88 adam), Jalpyulttyq sotsıal-demokratııalyq partııa — 42,4% (14 adam), «Aýyl» — 42% (29 adam), Qazaqstannyń Halyq partııasy — 41,7% (30 adam), «Baıtaq» — 38,3% (18 adam) jáne «Aq jol» — 34,9% (22 adam).
Jalpy 545 kandıdat tirkeldi. Al Quryltaı quramyna 145 depýtat enedi. Osylaısha, bir depýtattyq mandatqa shamamen 3,8 kandıdattan keledi.
Saılaý naýqanynyń kelesi kezeńi — Ortalyq saılaý komıssııasynyń kúntizbelik josparyna sáıkes is-sharalardy ótkizý, onyń ishinde saılaýaldy úgit-nasıhat jáne daýys berý kúnine deıingi ózge de rásimder.
Saılaýaldy úgit-nasıhat jumystary 23 shilde kúni saǵat 18:01–de bastalyp, 22 tamyz kúni saǵat 00:00–de aıaqtalady.
Aıta keteıik, buǵan deıin Quryltaı depýtattarynyń saılaýyna taǵy 10 halyqaralyq baıqaýshy akkredıttelgenin jazǵanbyz.
