Quryltaı saılaýy aldyndaǵy qorytyndy pikirsaıysqa partııa tóraǵalary qatysady
ASTANA. KAZINFORM – 19 tamyzda Quryltaı saılaýy aldyndaǵy qorytyndy pikirsaıys ótedi. Oǵan saılaýǵa qatysatyn barlyq partııanyń tóraǵalary qatysady. Bul týraly Ortalyq saılaý komıssııasynyń otyrysynda komıssııa múshesi Lázzat Súıindik málim etti.
Onyń aıtýynsha, «Saılaý týraly» Konstıtýtsııalyq zańnyń 28-babyna sáıkes, Quryltaı depýtattyǵyna kandıdattardyń partııalyq tizimderin usynǵan saıası partııalar Ortalyq saılaý komıssııasy uıymdastyratyn saılaý aldyndaǵy pikirsaıystarǵa qatysýǵa quqyly.
- Pikirsaıystardy ótkizýdiń negizgi qaǵıdattarynyń biri - barlyq qatysýshy úshin teń jaǵdaı jasaý. Olardy uıymdastyrý jáne ótkizý tártibi qandaı da bir saıası partııaǵa nemese onyń kandıdattaryna artyqshylyq bermeýge tıis. Saılaý aldyndaǵy pikirsaıysar saılaý zańnamasynyń talaptaryna, sondaı-aq Qazaqstan Respýblıkasy Ortalyq saılaý komıssııasynyń qaýlysymen bekitilgen Saılaý aldyndaǵy pikirsaıystardy ótkizý tártibi men sharttaryna sáıkes ótkiziledi. Osyǵan baılanysty saılaý aldyndaǵy televızııalyq pikirsaıystardy ótkizý alańyn, formaty men sharttaryn aıqyndaý boıynsha qajetti uıymdastyrý jumystary júrgizildi. Qazaqstan Respýblıkasy Mádenıet jáne aqparat mınıstrliginiń usynysy boıynsha qorytyndy pikirsaıystardy ótkizý alańy retinde «Habar» agenttigi» AQ-nyń «24KZ» telearnasy aıqyndaldy, - dedi Lázzat Súıindik.
OSK múshesiniń atap ótýinshe, «24KZ» telearnasyn tańdaý onyń tehnıkalyq jáne uıymdastyrýshylyq múmkindikterine, sondaı-aq aqparatty keń aýqymda taratý múmkindigine baılanysty. Bul debattardyń tolyqqandy televızııalyq translıatsııasyn qamtamasyz etip, ony barynsha kóp saılaýshynyń kórýine múmkindik beredi.
- Saılaý aldyndaǵy qorytyndy pikirsaıysty 2026 jylǵy 19 tamyzda «24KZ» telearnasynda ótkizý josparlanǵan. Sonymen qatar saılaý aldyndaǵy pikirsaıysty ótkizý reglamenti ázirlendi. Reglamentte pikirsaıysty ótkizý tártibi, qatysýshylarǵa qoıylatyn jalpy talaptar, sóz sóıleý kezektiligi, efır ýaqytynyń uzaqtyǵy jáne basqa da uıymdastyrýshylyq máseleler aıqyndalǵan. Telepikirsaıysty 4 raýndta ótikizý usynylady. Ár raýndtyń óz mindeti men formaty belgilengen. Birinshi raýnd - «Partııany tanystyrý». Ekinshi raýnd - «Opponentterge suraqtar». Úshinshi raýnd - «Kórermenderden suraqtar». Tórtinshi raýnd - «Saılaýshylarǵa úndeý». Búgingi tańda tirkelgen 7 partııanyń barlyǵy televızııalyq pikirsaıysqa qatysatynyn rastady. Barlyq partııanyń tóraǵalary pikirsaıysqa qatysady, - dedi OSK múshesi.
Buǵan deıin Ortalyq saılaý komıssııasy janyndaǵy Múgedektigi bar adamdardyń saılaý quqyqtaryn qamtamasyz etý jónindegi jumys tobynyń otyrysynda saılaý quqyqtaryn tolyqqandy júzege asyrýǵa jaǵdaı jasaýǵa qatysty praktıkalyq máseleler talqylanǵan edi.
