Qazaqstan partııalary negizgi saılaýshylar tobyn aıqyndady
ASTANA. KAZINFORM – Quryltaı saılaýyna baılanysty úgit-nasıhat naýqany qyzý júrip jatyr.
«Ádilet» partııasy munaıshylarmen kezdesýler ótkizse, JSDP men Qazaqstannyń Halyq partııasy áleýmettik kún tártibine basymdyq berip otyr. «Baıtaq» partııasy «Kóliksiz kún» aktsııasyn uıymdastyryp, «Aýyl» agrarlyq máselelerge nazar aýdarsa, «Aq jol» kásipkerlermen kezdesýler ótkizdi. Al «Respublica» Semeı qalasynda forým uıymdastyrdy. Úgit-nasıhat naýqany jarııa saıası pikirtalas kezeńine ótti.
Óndiris ujymdarynan jastarǵa deıin: partııalar qandaı toptarǵa bet burdy
«Ádilet» partııasy Atyraý oblysynyń ónerkásip salasy ókilderine – munaıshylarǵa, munaı óńdeý jáne vagon jasaý kásiporyndarynyń qyzmetkerlerine, munaı-gaz salasynyń ardagerleri men jastarǵa basymdyq berdi. Osy aýdıtorııamen jumys barysynda partııa ónerkásipti damytý, tsıfrlandyrý jáne eńbek adamyn qoldaý máselelerin zań ústemdigi men azamattardyń zań aldyndaǵy teńdigi taqyryptarymen ushtastyrdy.
«Aýyl» partııasy aýyl turǵyndaryna, fermerlerge jáne agroónerkásip kesheniniń ókilderine qaraı baǵyt ustandy. Ol qarsylastarynyń saılaýaldy baǵdarlamalaryn synady. Partııa ókilderi «Aq jol» men Respublica baǵdarlamalaryndaǵy jekelegen usynystarǵa kúmán keltirip, aýyl sharýashylyǵy, fermerlik jáne aýyldardy damytý máseleleri ekonomıkalyq kún tártibinde anaǵurlym mańyzdy oryn alýy tıis ekenin atap ótti.
«Baıtaq» partııasynyń negizgi aýdıtorııasy qorshaǵan ortanyń jaı-kúıine, tabıǵı resýrstardy utymdy paıdalanýǵa jáne kommýnaldyq ınfraqurylym sapasyna beıjaı qaramaıtyn azamattardan quraldy. Partııa «jasyl» ekonomıkany damytý, ekologııalyq qaýipsizdik jáne medıtsına qyzmetkerleriniń eńbek jaǵdaılaryn jaqsartý máselelerin kóterdi. Al «Kóliksiz kún» aktsııasy arqyly ekologııalyq jaýapkershilikti nasıhattady.
Jalpyulttyq sotsıal-demokratııalyq partııa tóraǵasy Ashat Rahımjanov QHP-nyń synyna jaýap berdi. Onyń sózinshe, QHP tóraǵasynyń orynbasary Beıbit Qusaıynov JSDP-ǵa orynsyz syn taqqan. Rahımjanov Konstıtýtsııanyń 2-babynda prezıdenttik basqarý nysany naqty bekitilgenin aıtty. Osyǵan súıene otyryp, JSDP tóraǵasy Qazaqstan Halyq partııasynyń ókilderi Ata zańnyń normalaryn qate túsindirip otyr dep málimdedi.
Qazaqstan halyq partııasynyń jaýaby kóp kúttirgen joq. Beıbit Qusaıynov Konstıtýtsııada bekitilgen prezıdenttik basqarý nysanyn emes, JSDP-nyń saılaýaldy baǵdarlamasyndaǵy prezıdenttik-parlamenttik basqarý modeline qaıta oralý týraly usynysty synaǵanyn málimdedi. QHP bul bastamany 1993 jylǵy saıası úlgige qaıta oralý áreketi dep baǵalap, onyń jańa Konstıtýtsııanyń qaǵıdalaryna sáıkes kelmeıtinin aıtty.
Qazaqstannyń «Aq jol» Demokratııalyq partııasy kásipkerlermen jáne naryq reformalaryn qoldaýshylarmen jumysyn jalǵastyryp keledi. Ol Respublica partııasymen ashyq pikirtalasqa túsip júr. Respublica ókilderiniń qymbat avtokólikterdi kórsetýge qatysty synyna jaýap retinde «Aq jol» ózderiniń «baılyqqa qarsy emes, kedeılikke qarsy» ekenin málimdedi, ıaǵnı kásipkerlikti damytýdy qoldaıtynyn bildirdi.
Al Respublica ókilderi «Aq joldyń» kóp jyldan beri berip kele jatqan ýádeleriniń is júzinde oryndalýyna kúmán keltirdi. Osylaısha, eki partııa arasyndaǵy pikirtalas jekelegen baǵdarlamalyq tarmaqtardyń aıasynan shyǵyp, bir saıası keńistiktegi kóshbasshylyq úshin básekege ulasyp barady. Olar kásipkerler men ońshyl elektorattyń múddesin qorǵaýǵa kimniń kóbirek quqyǵy bar ekenin de qyzý talqylap keledi.
Jalpy, partııaaralyq báseke – qazirgi saılaý naýqanynyń negizgi baǵyttarynyń biri. Eger úgit-nasıhattyń alǵashqy kezeńinde saıası partııalar negizinen ózderiniń saılaýaldy baǵdarlamalaryn tanystyrýǵa basymdyq berse, endi olar naýqandy qarsylastarymen tikeleı salystyrý arqyly júrgizýge kóbirek den qoıa bastady. Bul saıası pikirtalastyń qarqynyn kúsheıtip, baǵdarlamalar básekesin saılaýdyń negizgi kún tártibin aıqyndaý quqyǵy úshin kúreske birtindep ulastyryp jatyr.
Aıta keteıik, buǵan deıin Astanada Quryltaı depýtattarynyń saılaýyna deıingi keri sanaq iske qosylǵanyn jazǵanbyz.
