Quryltaı saılaýy: «Ádilet» partııasynyń saılaýaldy baǵdarlamasynda qandaı máseleler qamtylǵan
ASTANA. KAZINFORM – Búgin «Ádilet» partııasynyń kezekten tys III sezi ótti. Onda partııanyń saılaýaldy baǵdarlamasy jáne Quryltaı saılaýyna qatysatyn 186 kandıdattyń tizimi bekitildi. «Ádilettiń» saılaýshylarǵa tanystyrǵan baǵdarlamasyndaǵy joba-josparlar men maqsat-mindetterge sholý jasadyq.
Jıynda partııa tóraǵasy Aıbek Dádebaı málimdeme jasap, eń aldymen jańa Konstıtýtsııanyń mán-mańyzyna toqtaldy.
– Bıyl shildeden bastap Qazaqstan jańa Konstıtýtsııalyq dáýirge qadam basty. Bul Konstıtýtsııa memlekettik qurylysty zaman talabyna saı ózgertken quqyqtyq irgetasqa, táýelsiz Qazaqstan damýynyń ózgeshe dáýirin aıqyndaǵan tarıhı tańdaýǵa aınaldy. Ol azamat pen memleket arasyndaǵy qoǵamdyq kelisimdi úılesimdi negizde qaıta ornyqtyryp, ádilettilikke, zań ústemdigine, adamnyń qadir-qasıetine jáne jaýapty memlekettik basqarýǵa súıenetin tyń saıası júıeniń negizin qalady, – dedi Aıbek Dádebaı.
Onyń sózinshe, jańa Ata zańdaǵy normalar saıası partııalardyń da jaýapkershiligin kúsheıtti. Óıtkeni Konstıtýtsııa Qazaqstannyń bereke-birlik pen ortaq múddege uıyǵan, beıbit joldy qalaıtyn, adam men onyń ómirin eń qymbat qundylyq sanaıtyn, órkenıetke umtylǵan memleket ekenin anyqtap berdi. Aıbek Dádebaıdyń aıtýynsha, endigi basty mindet – jańa Konstıtýtsııanyń altyn ózegi bolyp otyrǵan osy qaǵıdalardy kúndelikti ómirdiń ómir saltyna aınaldyrý. Ádiletti sot, tıimdi memleket, adal ekonomıka, jaýapty azamattyq qoǵam, eńbek pen bilim joǵary baǵalanatyn orta – munyń bári Konstıtýtsııanyń ómirdegi kórinisi bolýy tıis.
– Osy tarıhı ózgeristerdiń tabysty júzege asýy saıası partııalardyń da jańa jaýapkershiligin talap etedi. «Ádilet» partııasy mine, osy tarıhı mindetti júzege asyratyn saıası kúshterdiń biri ǵana emes, biregeıi bolatyndyǵyna biz kámil senemiz, – dedi «Ádilet» partııasynyń tóraǵasy.
Onyń málimdeýinshe, partııa bolmysyn urandar emes, is-qımyl josparyn qamtıtyn baǵdarlamasy aıqyndaıdy.
– Búgin biz Qazaqstannyń aldaǵy 5 jyldyq kelesheginiń kelbetin sıpattaǵan saılaýaldy baǵdarlamamyzdy qabyldadyq. Biz úshin partııanyń bul tujyrymdamalyq qujaty – áste jalań ýádeler emes. Bul – jańa kezeńde iske asatyn jumystyń aýqymyn, sapasy men sıpatyn anyqtaıtyn keshendi is-qımyl jospary. Bılikke umtylǵan kez kelgen saıası kúsh, eń aldymen, «Biz eldi qaıda bastaımyz jáne oǵan qalaı jetemiz?» degen suraqqa jaýap berýi tıis. Búgin usynylyp, sizder qoldaǵan baǵdarlama dál osy suraqtarǵa tolyq jaýap beredi dep sanaımyz, – dedi Aıbek Dádebaı.
Onyń sózinshe, partııa baǵdarlamasy naqty nátıjege baǵyttalǵan. Tolyǵyraq aıtqanda, orta bıznestiń úlesin arttyrý, bir mıllıon sapaly jumys ornyn qurý, turǵyn úımen qamtýdy ulǵaıtý, sapaly bilim men densaýlyq saqtaýdy qoljetimdi etý, ómir súrý uzaqtyǵyn arttyrý, jasandy ıntellekt daǵdylaryn mıllıondaǵan azamatqa úıretý sııaqty kúndelikti ómirmen ólshenetin mindetter qoıyldy.
Sonymen birge, bul baǵdarlama – memlekettiń azamatqa ne beretini týraly ǵana emes, qoǵamnyń da jaýapkershiligin anyqtaıtyn qujat. Ádil memleket ádiletti qoǵamsyz qurylmaıdy.
– Zańǵa baǵynatyn azamatsyz zań ústemdigi ornaı almaıdy. Eńbekqor adamsyz qýatty ekonomıka qalyptaspaıdy. Bilimge umtylmaǵan qoǵam ınnovatsııalyq memleketke aınalmaıdy. Óz eliniń bolashaǵyna jaýapkershilikpen qaramaǵan halyqtyń erteńi baıandy bolýy ekitalaı. Sondyqtan biz qabyldaǵan baǵdarlamanyń túpki ıdeıasy – memleket pen qoǵam jáne jeke azamattyń jańa úılesimdi seriktestigi, – dedi partııa tóraǵasy.
Tsıfrlyq damý Qazaqstannyń keleshegin aıqyndaıdy
Sezde partııa Saıası keńesiniń múshesi Baǵdat Mýsın tsıfrlandyrý, jasandy ıntellektini damytý jáne memlekettik qyzmetterdi jetildirý baǵyttaryndaǵy maqsat-mindetterdi tanystyrdy.
Onyń sózinshe, tsıfrlandyrý barlyq saladaǵy qaıta qurýdyń negizgi quraly bolýy tıis.
– Basty másele – tehnologııalardyń ózinde emes, saladaǵy jetekshiniń tsıfrlyq transformatsııaǵa degen qyzyǵýshylyǵy. Sodan keıingi negizgi faktor – barlyq úderisterdiń ashyqtyǵy, – dedi «Qazaqtelekom» AQ Basqarma tóraǵasy Baǵdat Mýsın.
Sonymen qatar, partııa tek qazirgi úderisterdi taldaýǵa bastamashy bolyp qana qoımaı, músheleriniń sarapshylyq áleýetin paıdalanyp, jobalardy jetildirýge de qatysýy kerek.
– «Halyq únine qulaq asatyn memleket» tujyrymdamasynyń yqpalyn kúsheıtýmen aınalysamyz. Mysal retinde E-ótinish plaformasy edáýir ashyqtyqty qamtamasyz etkenin ataýǵa bolady. Endi oǵan tolyqqandy jasandy ıntellekt quraldaryn engizip, odan ári damytamyz. Óńirderde jáne eldi mekenderde qandaı máseleler bar ekenin zertteýge JI kómektesedi. Biraq osy baǵyttaǵy ózgerister elimizdiń barlyq azamatyna jetýi kerek. Ol úshin ınfraqurylym mańyzdy. Túkpir-túkpirdegi eldi mekenderge sapaly ǵalamtor jetkizý qajet. Tehnologııalyq táýelsizdikti qamtamasyz etý jáne Qazaqstandy dúnıejúzilik tehnologııalyq kartaǵa engizý maqsatynda «Derekterdi óńdeý ortalyqtary alqabyn» quryp jatyrmyz, – dedi Baǵdat Mýsın.
Sonymen birge, ol tsıfrlyq damý Qazaqstannyń keleshegin aıqyndaıtynyn atap ótti.
Áleýmettik júıege erekshe nazar aýdaryldy
Partııa saıası keńesiniń taǵy bir múshesi Dınara Zákıeva saılaýaldy baǵdarlamadaǵy áleýmettik máselelerge toqtaldy. Onyń sózinshe, bul salaǵa aıryqsha mán berilgen.
– Qazaqstan – áleýmettik memleket. Bul Konstıtýtsııada bekitilgen jáne is júzinde de dáleldenip keledi. Jyl saıyn memlekettik bıýdjettiń árbir besinshi teńgesi áleýmettik qajettilikterge baǵyttalady. «Ádilet» partııasynyń saılaýaldy baǵdarmasynda áleýmettik júıege erekshe nazar aýdaryldy, – dedi Dınara Zákıeva.
Onyń sózinshe, eń aldymen, áleýmettik kómekti naqty muqtaj azamattarǵa kórsetý kerek. Ol bul baǵyttaǵy qoldaýdyń ashyqtyǵyn qamtamasyz etý úshin biryńǵaı tsıfrlyq platformany qoldanýdy usyndy.
Sonymen qatar, áleýmettik kómektiń negizgi maqsaty – otbasylar men azamattarǵa ózin-ózi asyraýǵa kómektesý. Sol sebepti, Dınara Zákıeva ár otbasymen jeke jumys júrgizip, azamattardy jumyspen qamtý qajettigin atap ótti.
– Ekinshiden, negizgi basymdyq – otbasy men balalardyń ál-aýqatyn qamtamasyz etý. Elimizde 6 mln otbasy jáne 7 mln-ǵa jýyq bala bar. Memleket basshysynyń bastamasymen osy salada mańyzdy reformalar júzege asyrylyp jatyr, 11 zań qabyldandy. Sonyń nátıjesinde, qıyn jaǵdaılardyń aldyn alý jáne qoldaý kórsetý úshin keshendi júıe quryldy. Atap aıtqanda, ónirlerdegi ár aýdan ákimdikterinde Balalardyń quqyqtaryn qorǵaý basqarmalary quryldy, psıhologııalyq qoldaý ortalyqtary jáne 111 biryńǵaı memlekettik senim telefony ashyldy, balalar uıymdaryn lıtsenzııalaý engizildi, – dedi ol.
Dınara Zákıeva atalǵan mehanızmderdi jetildirýdi, jańa standarttar men tásilder engizýdi, qoldanylatyn tsıfrlyq quraldardy nyǵaıtýdy jáne eGov platformasynda balalarǵa arnalǵan tsıfrlyq marshrýt qurýdy usyndy.
– Sonymen qatar osy jyly «Qazaqstan balalary» baǵdarlamasy qabyldandy. Baǵdarlama aıasynda 158 is-shara kózdelgen. Olardyń árqaısysy naqty máseleni sheshýge baǵyttalǵan. Mysaly, balalar aýrýhanalaryn qajetti jabdyqtarmen qamtamasyz etý, barlyq óńirde balalardyń qoǵamdyq kólikte tegin júrýi, psıhologtar men qorǵanshylyq organdarynyń jalaqysyn arttyrý, balalarǵa arnalǵan ınfraqurylymdy damytý jáne jaqsartý t.b. máseleler qarastyrylǵan, – dedi ol.
Quryltaıǵa kandıdattyń sózinshe, partııanyń mindeti – «Qazaqstan balalary» baǵdarlamasyn sapaly túrde oryndaý.
Bulardan bólek, Dınara Zákıeva múgedektigi bar azamattarǵa jáne zeınetkerlerge kórsetiletin áleýmettik qoldaý sharalaryna toqtalyp, usynystaryn jetkizdi.
Aıta keteıik, buǵan deıin «Ádilet» partııasynda múshelik jarnanyń kólemi aıqyndalǵanyn jazǵanbyz.
