Quryltaı saılaýy: «Ádilet» partııasy halyqtyń qoldaýyna rızashylyq bildirdi
ASTANA. KAZINFORM — «Ádilet» partııasynyń tóraǵasy Aıbek Dádebaı saılaý qorytyndysy boıynsha saılaýshylarǵa úndeý jasady.
Ol saılaýshylarǵa bildirgen senimi men qoldaýy úshin alǵys aıtty. Sondaı-aq partııanyń halyq aldyndaǵy jaýapkershiligine toqtalyp, aldaǵy ýaqytta partııa baǵdarlamasyn júzege asyrýǵa basymdyq beriletinin jetkizdi.
— Saılaýaldy naýqan kezinde elimizdiń ár óńirin aralap, talaı azamatpen júzdestik. Ár kezdesýde halyqtyń muń-muqtajyn, oıy men usynysyn óz aýzynan estidik. Aıtylǵan ár pikir biz úshin mańyzdy, olardyń barlyǵy aldaǵy jumysymyzda eskeriledi. Bul saılaý ashyq, ádil ári aıqyn ótti. Saıası partııalar arasynda shynaıy básekelestik boldy. Sizderdiń senimderińiz biz úshin úlken jaýapkershilik. Biz halyqtyń úmitin aqtaý úshin aıanbaı eńbek etemiz. Bizge senip, «Ádilet» partııasyn qoldaǵan ár azamatqa shyn júrekten alǵys aıtamyz! — dedi Aıbek Dádebaı.
Eske salsaq, buǵan deıin Quryltaı saılaýyna qatysty alǵashqy Exit poll nátıjesi belgili boldy.
Sonymen qatar, OSI qoǵamdyq saıasat ınstıtýty Jetinshi arnanyń tapsyrysy boıynsha júrgizgen ekzıtpoldyń aldyn ala nátıjesin jarııalady.
Budan bólek, «Sotsıs-A» Keshendi áleýmettik zertteýler ınstıtýty Quryltaı saılaýynda júrgizgen Exit poll nátıjesin jarııa etti.
