Quryltaı saılaýy ádil ári ashyq ótti — TMD mıssııasynyń qorytyndysy
ASTANA. KAZINFORM — Táýelsiz Memleketter Dostastyǵynyń baıqaýshylar mıssııasy 23 tamyzda ótken Quryltaı depýtattarynyń saılaýyn baqylaý qorytyndysyn shyǵardy. Qorytyndy nátıjesin Ortalyq saılaý komıssııasynda ótken brıfıngte TMD mıssııasynyń basshysy Igor Petrıshenko jarııa etti.
Onyń aıtýynsha, daýys berý joǵary uıymdastyrýshylyq deńgeıde ári eldiń saılaý zańnamasyna sáıkes ótti. Mıssııa Qazaqstan Syrtqy ister mınıstrliginiń shaqyrýymen saılaýdy daıyndaý jáne ótkizý barysyn 3 tamyzdan bastap baqylady. Mıssııa quramyna 190 baıqaýshy kirdi. Olar respýblıka zańnamasy men ashyqtyq, beıtaraptyq jáne aralaspaý qaǵıdattaryn basshylyqqa alyp, erkin ári táýelsiz jumys istedi.
— Qazaqstan Respýblıkasynyń saılaý zańnamasy jalpyǵa tanylǵan qaǵıdattar men halyqaralyq quqyqtyń qoldanylatyn normalaryna sáıkes keledi jáne saılaýdy erkin ári demokratııalyq túrde ótkizýge jetkilikti quqyqtyq negiz sanalady, — dedi Igor Petrıshenko.
23 tamyz — daýys berý kúni mıssııa ókilderi 900-den astam saılaý ýchaskesine bardy. Sondaı-aq sheteldegi saılaý ýchaskelerindegi saılaý barysyn baqylady. Baıqaýshylardyń málimetinshe, barlyq ýchaske ýaqytly ashylyp, daýys berý uıymdasqan, tynysh ári qolaıly jaǵdaıda ótti.
— Daýystardy sanaý rásimi konstıtýtsııalyq zańǵa sáıkes júrgizildi. Baıqaýshylar aıtqan jekelegen eskertýler tehnıkalyq sıpatta boldy jáne olardy ýchaskelik komıssııalar jedel túrde joıdy. Saılaý nátıjesine áser etýi múmkin zań buzýshylyqtar anyqtalǵan joq, — dep atap ótti ol.
Baqylaý qorytyndysynda TMD mıssııasy Quryltaı depýtattarynyń saılaýy Qazaqstan zańnamasyna tolyq sáıkes ótkizildi degen qortaq uıǵarymǵa keldi.
— Qazaqstan Respýblıkasy Quryltaıy depýtattarynyń 2026 jylǵy 23 tamyzdaǵy saılaýy joǵary uıymdastyrýshylyq deńgeıde ótip, ádil, básekeli jáne ashyq boldy. Ol Qazaqstan azamattarynyń óz erkin bildirý quqyǵyn júzege asyrýyn qamtamasyz etti, — delingen mıssııa málimdemesinde.
Buǵan deıin Quryltaı depýtattary saılaýynyń nátıjesin jarııalaǵan edik.
