Quryltaı saılaýy: 7 saıası partııa saılaýaldy shtabtaryn ashty
ASTANA. KAZINFORM – Búgin, 23 shilde kúni saǵat 18:01-de Quryltaı depýtattaryn saılaýǵa qatysatyn partııalardyń saılaýaldy úgit-nasıhat naýqany bastaldy. Úgit-nasıhat jumystary 22 tamyz saǵat 00:00-ge deıin jalǵasady.
Quryltaı saılaýyna qatysý úshin Qazaqstannyń jeti saıası partııasy tirkeldi. Naýqannyń alǵashqy kúni partııalar saılaýaldy shtabtaryn ashyp, saılaýshylarmen jumys júrgizý josparlaryn tanystyrdy.
«Ádilet» partııasy
«Ádilet» partııasy Astanada respýblıkalyq saılaýaldy shtabyn ashyp, saılaýshylarmen jumysty bastady. Shtabtyń ashylý rásimi alǵash ret JI-moderatory bar tsıfrlyq formatta uıymdastyryldy. Bir mezette el boıynsha partııanyń 20 óńirlik jáne 226 aýmaqtyq shtaby, sondaı-aq 30 myńǵa jýyq senimdi ókili jumysqa kiristi. Saılaýaldy naýqan aıasynda partııa 21 myńnan astam is-shara ótkizýdi josparlap otyr.
JSDP
Jalpyulttyq sotsıal-demokratııalyq partııa Astanada Ortalyq saılaýaldy shtabyn ashyp, saılaýaldy baǵdarlamasyn tanystyrdy. Sharaǵa partııa tóraǵasy Ashat Rahymjanov, Quryltaı depýtattyǵyna kandıdattar, partııa belsendileri men qoǵam ókilderi qatysty. Azamattarmen baılanysty kúsheıtý maqsatynda partııa «Ashyq minber», «Halyq telefony» jáne «Bolashaq Quryltaıǵa hat» atty jańa jobalardy iske qosty. Osy alańdar arqyly azamattardyń ótinishteri men usynystaryn qabyldaýdy josparlap otyr.
«Baıtaq» jasyldar partııasy
«Baıtaq» jasyldar partııasy saılaýaldy naýqandy úılestiretin Ortalyq shtabtyń jumysyn bastady. Ashylý rásimine partııa tóraǵasy Azamathan Ámirtaev, Quryltaı depýtattyǵyna kandıdattar, shtab músheleri men partııa apparatynyń qyzmetkerleri qatysty. Ashylýdan keıin alǵashqy otyrys ótip, aldaǵy mindetter men jumys kestesi bekitildi. Óńirlik shtabtar jıynǵa onlaın formatta qosylǵan.
Qazaqstannyń halyq partııasy
Qazaqstannyń halyq partııasy el boıynsha saılaýaldy 155 shtabty iske qosyp, úgit-nasıhat naýqanyn bastady. Onyń ishinde 17 oblystyq, 29 qalalyq jáne 109 aýdandyq shtab bar. Partııa ókilderiniń aıtýynsha, bul shtabtar saılaýshylarmen kezdesýler ótkizýge jáne óńirlerdegi partııa ókilderiniń jumysyn úılestirýge negiz bolady. Sondaı-aq naýqannyń alǵashqy kúni partııa óziniń resmı ánuranyn tanystyrdy.
«Aýyl» partııasy
Munda saılaýaldy shtabtyń ashylý rásimine partııa tóraǵasy ári shtab jetekshisi Qaırat Aıtýǵanov, Quryltaı depýtattyǵyna kandıdattar, óńirlik shtabtardyń basshylary jáne jastar qanatynyń ókilderi qatysty. Partııanyń málimetinshe, aldaǵy bir aıda el boıynsha 6 500-den astam úgit-nasıhat is-sharasy ótkizilip, olar 2,2 mıllıonnan astam saılaýshyny qamtıdy. Naýqannyń bastalý keshinde shtabtardyń negizgi jumys baǵyttary men partııanyń saılaýaldy baǵdarlamasy tanystyryldy.
«Aq jol» demokratııalyq partııasy
«Aq jol» demokratııalyq partııasy saılaýaldy úgit-nasıhat naýqanyn Almaty oblysyndaǵy demalys bazasynda bastady. Іs-sharaǵa partııa tóraǵasy Danııa Espaeva, Quryltaı depýtattyǵyna kandıdattar, partııa belsendileri jáne jastar qanatynyń ókilderi qatysty. Naýqannyń bastalýy partııanyń barlyq 20 óńirlik fılıalymen tikeleı telekópir arqyly baılanys ornatýmen ótti. Resmı bólim aıaqtalǵan soń partııa ókilderi Almaty qalasynda alǵashqy úgit-nasıhat aktsııasyn ótkizdi.
Respublica partııasy
Respublica partııasy respýblıkalyq saılaýaldy shtabyn ashyp, bir ýaqytta eldiń barlyq 20 óńirindegi shtabtarynyń jumysyn bastady. Sharaǵa partııa basshylyǵy, Quryltaı depýtattyǵyna kandıdattar men belsendiler qatysty. Ashylý rásiminiń ereksheligi – partııa tóraǵasy Aıdarbek Qojanazarovtyń Instagram jelisinde smart-kózildirik arqyly tikeleı efır ótkizýi boldy. Sonyń arqasynda kórermender is-sharany birinshi adamnyń kózimen tamashalaı aldy. Saltanatty rásimnen keıin kandıdattarǵa kýálikteri tabystalyp, olar saılaýaldy úgit-nasıhat jumysyna kiristi.
Aıta keteıik, saılaýaldy úgit-nasıhat naýqany 22 tamyzda aıaqtalady. Odan keıin «tynyshtyq kúni» bastalady.
Eske salaıyq, 1 shildede Qazaqstan Prezıdenti Quryltaı saılaýyn taǵaıyndady. Keıin Ortalyq saılaý komıssııasy Quryltaı depýtattaryn saılaýdyń kúntizbelik josparyn jáne saılaýǵa qatysatyn saıası partııalardyń tizimin bekitti.
Qazirgi tańda barlyǵy 545 kandıdat tirkelgen. Al Quryltaı quramyna 145 depýtat enedi. Osylaısha bir depýtattyq mandatqa orta eseppen 3,8 kandıdattan keledi.
