Quryltaı otyrysy: veterınar dárigerlerdiń mártebesin kóterý qujaty qaralady
ASTANA. KAZINFORM — Búgin Quryltaıdyń jalpy otyrysy ótedi.
Onda depýtattar veterınarııa máseleleri boıynsha engiziletin ózgeristerdi talqylaıdy.
Aıta keteıik, 30 qazanda Quryltaı tóraǵasy Aıbek Dádebaıdyń tóraǵalyǵymen ótken Bıýro otyrysynda Quryltaıdyń aldaǵy otyrysynyń kún tártibi naqtylandy.
Birinshi oqylymda Veterınarııa máseleleri boıynsha keıbir zańnamalyq aktilerge engiziletin ózgerister men tolyqtyrýlar jobasy qaralady. Túzetýler memlekettik organdardyń veterınarııa salasyndaǵy ókilettikteriniń ara-jigin ajyratýǵa, veterınarııalyq dárigerlerdiń mártebesin kóterýge jáne olardy áleýmettik qoldaýǵa baǵyttalǵan.
Salany tsıfrlandyrýǵa da erekshe kóńil bólinip otyr. Buǵan qosa, veterınarııalyq baqylaý men bıologııalyq qaýipsizdik talaptaryn kúsheıtý, veterınarııalyq qyzmet sýbektileriniń jaýapkershiligin arttyrý sharalary da usynylady.
Buǵan deıin habarlanǵandaı, bıyl tamyzda Aýyl sharýashylyǵy mınıstrliginde ótken keńeste veterınarııalyq qaýipsizdik, ınfraqurylymdy damytý jáne salany tsıfrlandyrý máseleleri qaraldy.
Memleket basshysynyń tapsyrmasyna sáıkes, Mal sharýashylyǵyn damytýdyń keshendi josparymen qatar, 2026–2030 jyldarǵa arnalǵan Veterınarııany damytýdyń keshendi jospary bekitildi. Ony iske asyrýǵa 66,2 mlrd teńge qarastyrylǵan.
Sonymen qatar, depýtattar «Qazaqstan Respýblıkasy men Azııa Damý Banki arasyndaǵy Qaryz týraly kelisimdi (Jaı operatsııalar) (Fıskaldyq basqarý jáne qarjy sektory reformalarynyń baǵdarlamasy — 2-kishi baǵdarlama) ratıfıkatsııalaý týraly» Qazaqstan Respýblıkasy Zańynyń jobasyn qaraıdy.
Budan bólek, Quryltaıda «Tsıfrlandyrý jáne jasandy ıntellekt jyly aıasynda ekonomıkanyń naqty sektory salalaryn tsıfrlyq transformatsııalaý» taqyrybynda tyńdaý ótkizý týraly aqparat qaralady.
Quryltaıdyń baspasóz qyzmeti taratqan málimetke qaraǵanda, jalpy otyrys qorytyndysy boıynsha BAQ ókilderine arnalǵan brıfıng ótkizý josparlanyp otyr. Onda veterınarııa máseleleri boıynsha ózgerister engizý týraly zań jobasy jóninde spıkerler retinde aýyl sharýashylyǵy vıtse-mınıstri Ermek Kenjehanuly, Quryltaı depýtattary Serik Egizbaev jáne Bota Eleýsizova (jumys tobynyń jetekshisi) shaqyrylady.
Al ekinshi zań jobasy — Qazaqstan men Azııa Damý Banki arasyndaǵy kelisimge qatysty Qarjy mınıstri Mádı Tákıev jáne Quryltaı depýtaty, jumys tobynyń jetekshisi Qaırat Aıtýǵanov tilshiler suraqtaryna jaýap beredi.
Eske salsaq, ótken aptadaǵy Qurylytaı otyrysynda depýtattar «2014 jylǵy 29 mamyrdaǵy Eýrazııalyq ekonomıkalyq odaq týraly shartqa ózgerister engizý jóninde hattamany ratıfıkatsııalaý týraly» zań jobasyn eki oqylymda qarap, qabyldady.
Qujatty tanystyrǵan Saýda jáne ıntegratsııa mınıstri Arman Shaqqalıevtyń málimetinshe, hattamaǵa 2025 jylǵy 28 shildede Máskeý qalasynda Eýrazııalyq ekonomıkalyq odaqqa múshe memleketterdiń basshylary qol qoıdy. Onyń erejeleri Odaq aıasyndaǵy quqyqtyq retteýdi jetildirýge jáne quqyq qoldaný praktıkasy barysynda anyqtalǵan olqylyqtardy joıýǵa baǵyttalǵan.
— Usynylyp otyrǵan hattamada Eýrazııalyq ekonomıkalyq odaq týraly shartqa 30 túzetý engizý kózdelgen. Olar ishki naryqtyń jumys isteýi, memlekettik satyp alý, tehnıkalyq retteý, kórsetiletin qyzmetter saýdasy, básekelestik, elektr energetıkasy jáne kólik máselelerin qamtıdy. Atap aıtqanda, Eýrazııalyq ekonomıkalyq komıssııanyń Odaqtyń ishki naryǵyndaǵy kedergilerdi ádisnamalyq turǵudan saralaý jáne tosqaýyldar men shekteýlerdi joıyldy dep taný jónindegi ókilet bekitiledi. Atalǵan norma komıssııa jumysynyń biryńǵaı tásilin qalyptastyrýdyń quqyqtyq negizin aıqyndaıdy jáne elderimiz arasyndaǵy kedergisiz ortany qalyptastyrýdy jaqsartýǵa yqpal etedi, — dedi ol.
Sonymen qatar 28 qazandaǵy Quryltaı otyrysynda tóraǵa Aıbek Dádebaı Prezıdent Joldaýynyń mańyzy jóninde málimdeme jasady.
Onyń sózinshe, Memleket basshysynyń Joldaýy — elimizdiń jańa jaǵdaıdaǵy aldaǵy naqty damý baǵdaryn aıqyndaıtyn baǵdarlamalyq qujat.
— Bul — Konstıtýtsııa qabyldanyp, búkil saıası júıe jańǵyrtylǵannan keıingi alǵashqy joldaý. Endi Memleket basshysy jańa saıası ınstıtýttardyń aldyna naqty mindetter qoıyp otyr, ıaǵnı — júrgizip jatqan reformalardy naqty mazmunmen baıytyp, olardyń júzege asyrylýyn qamtamasyz etý. Osy oraıda, Quryltaı depýtattaryna da zor úmit artyp otyr, — dedi Aıbek Dádebaı.
