Quryltaı nátıjesi: Shekara mańyndaǵy 3,5 mln halyqtyń jaǵdaıy jaqsarady

ASTANA. KAZINFORM — Ulttyq quryltaı jańadan qurylǵan oblystardyń damýyna aıryqsha serpin berdi. Bul pikirdi Májilis depýtaty, qoǵam qaıratkeri Nurtaı Sabılıanov Qyzylordada ótip jatqan V Ulttyq quryltaıda aıtty.

Depýtat jaqynda óńirlerge saparlap, saılaýshylarmen tikeleı kezdesý ótkizgenin atap ótti.

— Sapar barysynda el kóleminde iske asyrylyp jatqan irgeli ister men baıypty bastamalardyń mazmuny men mánin halyq joǵary baǵalap otyrǵanyna kóz jetkizdik. Ásirese jańadan qurylǵan Abaı, Jetisý, Ulytaý oblystarynda atqarylyp jatqan sharýalar júıelenip, naqty qurylymǵa ıe bolyp, oń nátıjesin berip jatyr. Munyń jemisin qarapaıym halyq kórip otyr. Jańa oblystardaǵy aýqymdy jumystyń júzege asýyna osy óńirlerdi qarjylaı qoldaý jóninde Sizdiń ulttyq quryltaı otyrysynda bergen tapsyrmańyz aıryqsha serpin berdi. Sonyń nátıjesinde qomaqty qarjy bólindi. Ózim saılanǵan Abaı oblysyna respýblıkalyq bıýdjetten aldaǵy úsh jylǵa 1 trln 200 mlrd teńge qarastyryldy. Bul bizdiń óńirimiz úshin buryn-sońdy bolmaǵan naqty ári qomaqty qarjylaı qoldaý, — dedi Nurtaı Sabılıanov.

Sonymen birge, elimizdiń shyǵys óńirlerinde kúrdeli máselege aınalǵan respýblıkalyq Óskemen — Aıagóz — Taldyqorǵan, Qalbataý — Maıqapshaǵaı, Semeı — Óskemen baǵytyndaǵy joldar jóndelip, kólik qozǵalysy edáýir jaqsarǵan. Osy turǵyda Qarqaraly — Aıagóz — Buǵaz respýblıkalyq avtojolyn da jóndeý mańyzdy. Bul jol tolyq jóndelse, shyǵys pen ortalyq óńirler arasyndaǵy baılanys nyǵaıa túser edi.

— Oǵan qosa, Sizdiń Býrabaıdaǵy Quryltaı otyrysynda aıtqan usynysyńyzǵa sáıkes, el tarıhynda alǵash ret shekaralyq aýmaqtardy damytýǵa arnalǵan zań jobasy daıyndaldy. Bul eldiń aýmaqtyq tutastyǵy men ekonomıkalyq turaqtylyǵyn nyǵaıtýǵa yqpal etetin strategııalyq qujat. Zań qabyldansa, 65 shekaralyq aýdandaǵy 3,5 mln jýyq halqynyń jaǵdaıy jaqsara túsedi, — dep tolyqtyrdy Májilis depýtaty.

Aıta keteıik, Qyzylordada Memleket basshysy Qasym-Jomart Toqaevtyń qatysýymen Ulttyq quryltaıdyń besinshi otyrysy bastaldy. Quryltaıdaǵy talqylaýǵa tanymal memleket jáne qoǵam qaıratkerleri, saıası partııalardyń, úkimettik emes sektordyń, bıznes-qaýymdastyqtardyń, saraptamalyq qaýymdastyqtyń jáne oblystardyń qoǵamdyq keńesteriniń ókilderi keldi.

Buǵan deıin Memlekettik keńesshi Erlan Qarın Býrabaıdaǵy quryltaıdyń negizgi nátıjelerin baıandaǵan edi.