Quryltaı minberinen týysyn quttyqtaǵan depýtattar qalaı jazalanady
ASTANA. KAZINFORM – Búgin Quryltaıdyń jalpy otyrysynan keıingi baspasóz máslıhatynda depýtat Snejanna Imasheva depýtattyń etıkasyna qatysty qandaı talaptar qoıylǵanyn túsindirdi.
- Depýtattyń etıkasy Konstıtýtsııalyq zańda qaralǵan jáne búgin qabyldanǵan Reglamentte rettelgen. Árıne, depýtat óz qyzmetinde ádep qaǵıdalaryn saqtaýy tıis, ıaǵnı tek Quryltaıda ǵana emes, odan tys jerde de. Buqaralyq aqparat quraldaryna suhbat bergende, áleýmettik jelidegi jazbalarynda osy talaptar oryndalýy qajet. Depýtattar óz málimetterinde naqtylanǵan derekterge súıenýi tıis. Quryltaı depýtattary óz áriptesteriniń ar-namysyna nuqsan keltirmeýi kerek, - dedi S. Imasheva.
Sonymen qatar ol depýtattarǵa Quryltaı minberinen týystary men tanystaryn quttyqtaýǵa jol berilmeıtinin aıtty.
- Bul jaǵdaı Reglamentpen bekitilgen, ıaǵnı tek Quryltaıǵa qatysty máseleni kóterýi tıis. Quryltaı minberinen jeke bireýlerdi quttyqtaýǵa bolmaıdy. Eger osynda áreket oryn alsa, onda ádep jónindegi keńes osy máseleni qarap, tıisti jazasyn beredi. Bul turǵyda Quryltaı jınalysyna qatystyrmaý, jalaqysynan aıyrý jáne basqa da jaýapkershilik qarastyrylǵan, - dedi Snejanna Imasheva.
Jańa Reglamenttegi jazalaý tártibi
«Qazaqstan Respýblıkasynyń Quryltaıy jáne onyń depýtattarynyń mártebesi týraly» Qazaqstan Respýblıkasynyń Konstıtýtsııalyq zańynda belgilengen depýtattyq ádep qaǵıdalaryn buzǵan jaǵdaıda depýtatqa mynadaı jazalaý sharalary qoldanylýy múmkin:
1) mineý;
2) kópshilik aldynda keshirim suraýǵa májbúr etý;
3) Quryltaıdyń bir otyrysynda sóz bermeý;
4) Quryltaıdyń úsh otyrysynda sóz bermeý;
5) Quryltaıdyń bir otyrysy ýaqytyna otyrys zalynan shyǵaryp jiberý;
6) Quryltaıdyń úsh otyrysy ýaqytyna otyrys zalynan shyǵaryp jiberý;
7) bir kúndik jalaqysynan aıyrý.
Bul týraly sheshimdi Quryltaı Tóraǵasy qabyldaıdy jáne ol onyń ókimimen resimdeledi. Depýtattyń depýtattyq ádep qaǵıdalaryn buzý faktisin anyqtaý jáne jazalaý sharalaryn qoldaný úshin Ortalyq saılaý komıssııasyna júginý qajettigi máseleleri boıynsha Quryltaı Tóraǵasy Depýtattyq ádep jónindegi keńestiń usynymdaryn eskerýge quqyly.
Atap aıtqanda, depýtattarǵa jazalaý sharalaryn qoldanýǵa baılanysty máselelerdi Qazaqstan Respýblıkasynyń Ortalyq saılaý komıssııasy daıyndaıdy.
Osyǵan deıin Quryltaıdyń ár depýtatynyń jumys tıimdiligin baǵalaıtyn arnaıy júıe engizilmeıtini týraly aıttyq.
