Quryltaı men Halyq keńesine zań shyǵarý bastamasy quqyǵyn berý jan-jaqty saralanǵan baılam – Іzmuhambetov
ASTANA. KAZINFORM – Quryltaı men Halyq keńesine zań shyǵarý bastamasy quqyǵyn berý jan-jaqty saralanǵan baılam. Bul týraly Konstıtýtsııalyq reformalar jónindegi komıssııanyń otyrysynda Májilis depýtaty Baqtyǵoja Іzmuhambetov aıtty.
– Árıne, konstıtýtsııalyq reformanyń túpki máni – halyqtyń memleket basqarýy isine qatysý tetikterin keńeıtý. Sondaı-aq qoǵamdyq pikirdi sheshim qabyldaý úderisiniń ózegine aınaldyrý ekenin jaqsy bilesizder. Ata zańymyzǵa Halyq keńesiniń mártebesin halyqtyń múddesin bildiretin joǵary konsýltatıvtik organ retinde bekitý usynylyp otyr. Demek, Quryltaı men Halyq keńesiniń jumysy mazmundyq jaqtan úndesip, birin-biri tolyqtyryp, jetildirip otyrady. Osylaısha, «halyq únine qulaq asatyn memleket» tujyrymdamasyn tolyqqandy júzege asyra alatyn bolamyz, - dedi ol.
Osy oraıda Májilis deptýtaty Quryltaı men Halyq keńesine qatysty normalardy Konstıtýtsııada bekitý jáne eki organǵa da zań shyǵarý bastamasy quqyǵyn berý ýaqyt talabynan týyndaǵan, jan-jaqty saralanǵan baılam ekenin aıtady.
– Bul qadamdar qoǵamdyq dıalogty birrettik naýqan emes, turaqty jumys formatyna aınaldyrýdy kózdeıdi jáne onyń praktıkalyq tıimdiligin arttyrýǵa baǵyttalyp otyr. Quryltaıdy proportsıonaldy saılaý júıesi arqyly qalyptastyrý saıası belsendilikti shektemeıdi. Kerisinshe, bul júıe saıası turaqtylyq pen ókildiktiń teńgerimin saqtaýǵa múmkindik beredi. Al azamattar Halyq keńesi arqyly da memlekettiń isine tikeleı yqpal ete alady, - dedi Baqtyqoja Іzmuhambetov.
Májilis depýtatynyń paıymynsha, bul – halyqtyń únin bılikke jetkizýdiń balama emes, tolyqqandy joly, altyn kópiri.
– Halyq keńesiniń artyqshylyǵy – onyń keń ókilettiginde. Demek, Halyq keńesi keńesshi organ ǵana emes, halyqtyń oıy aıtylatyn, usynysy jetkiziletin, azamattyq ustanymy eskeriletin alańǵa aınalady. Halyq keńesi ázirlegen usynystar tek konsýltatıvtik formatta ǵana emes, zańnama deńgeıinde qaralady. Osylaısha, Halyq keńesi ishki saıasattyń basty baǵyttary boıynsha usynys beredi. Qoǵamdyq kelisim men ulttyq birlikti nyǵaıtýǵa yqpal etedi. Jalpy ulttyq qundylyqtardy ilgeriletýge aralasady. Eń bastysy Halyq keńesi Quryltaıǵa zań jobalaryn usynýǵa ıe. Sondaı-aq respýblıkalyq referendým ótkizý týraly bastama kótere alady. Sonymen qatar Halyq keńesindegi rotatsııa qaǵıdaty qoǵamnyń ártúri toptary men óńirlerdiń basqarý isine keńinen qatysýyna jol ashady. Bul demokratııany qaǵaz júzinde emes, is júzinde júzege asyrýdyń aıqyn kórinisi, - dedi ol.
Buǵan deıin E.Bóketov atyndaǵy Qaraǵandy ýnıversıtetiniń rektory Nurlan Dýlatbekov jańartylatyn Konstıtýtsııanyń kirispesindegi ózgeshelikterdi tárbıe quraly retinde baǵalady.