Quryltaı memlekettik nagradalar týraly zań jobasyn maquldady
ASTANA. KAZINFORM – Búgin Quryltaıdyń jalpy otyrysynda «QR memlekettik nagradalary týraly» QR Zańyna ózgerister men tolyqtyrýlar engizý týraly» zań jobasy І oqylymda maquldandy.
– Zań jobasynyń negizgi maqsaty – otandyq mádenıet pen ónerdiń damýyna eleýli úles qosqan azamattardyń eńbegin memlekettik deńgeıde taný jáne olardy yntalandyrý, – dep málimdedi zań jobasyn tanystyrǵan Quryltaı depýtaty Lázzat Jylqybaeva.
Onyń sózinshe, osy maqsatta eki jańa erekshelik belgisin engizý usynylady.
– Birinshisi - «Shámshi Qaldaıaqov» medali. Atalǵan medal otandyq mýzyka óneri men án shyǵarmashylyǵyn damytýǵa eleýli úles qosqan, jemisti qyzmet atqaryp, erekshe eńbek sińirgen azamattardy marapattaýǵa taǵaıyndalady.
Ekinshisi - «Qazaqstannyń eńbek sińirgen sýretshisi» qurmetti ataǵy. Bul ataq beıneleý óneri salasynda joǵary kásibı sheberlik tanytyp, úzdik týyndylarymen otandyq kórkem mádenıetti damytýǵa eleýli úles qosqan qaıratkerlerge beriletin bolady. Jańa Konstıtýtsııada tól mádenıetimizdi qoldaý memlekettiń mańyzdy mindetteriniń biri retinde bekitildi. Bul marapattar – osy konstıtýtsııalyq qaǵıdatty júzege asyrýdyń naqty tetikteriniń biri, – dedi Quryltaı depýtaty.
Onyń málimdeýinshe, Ulttyq mádenıet pen ónerge qaltqysyz qyzmet etip júrgen azamattardyń eńbegin memlekettik deńgeıde moıyndaý – olardyń shyǵarmashylyǵyna kórsetilgen qurmet qana emes, sonymen qatar qoǵamdaǵy eńbekqorlyq pen jasampazdyq qundylyqtaryn nyǵaıtýdyń mańyzdy tetigi.
Aıta keteıik, buǵan deıin Quryltaıdyń jalpy otyrysynda depýtat Tatıana Savelevanyń ókilettigi merziminen buryn toqtatylǵanyn jazǵanbyz.
