Quryltaı konstıtýtsııalyq organdardy qalyptastyratyn bedeldi ınstıtýtqa aınalady – Erlan Qarın

ASTANA. KAZINFORM – Memlekettik keńesshi – Konstıtýtsııalyq komıssııa tóraǵasynyń orynbasary Erlan Qarın Konstıtýtsııalyq reforma jónindegi komıssııanyń birinshi otyrysynda Quryltaıdyń negizgi memlekettik organdardyń quramyn jasaqtaý isindegi quzyreti qandaı bolatynyn túsindirdi.

– Memleket basshysy negizgi memlekettik organdardyń quramyn jasaqtaý isindegi Quryltaıdyń quzyretine qatysty usynystaryn Qyzylordadaǵy Quryltaıda aıtyp ótti. Bir palataly Parlament úlgisine kóshýge baılanysty zań shyǵarýshy organnyń rólin kúsheıtý kezinde tejemelik tepe-teńdik júıesin qamtamasyz etý óte mańyzdy. Qazirgi Konstıtýtsııaǵa sáıkes, Konstıtýtsııalyq sottyń, Joǵary aýdıtorlyq palatanyń jáne Ortalyq saılaý komıssııasynyń quramyn jasaqtaý quzyreti Májilis, Senat jáne Prezıdent arasynda teńdeı bólingen. Endi osy mańyzdy memlekettik qurylymdardyń barlyq múshesi Quryltaıdyń kelisimimen ǵana taǵaıyndalýy qajet degen usynys aıtyldy, - dep eske saldy Memlekettik keńesshi.

Sondaı-aq Prezıdenttiń usynysy boıynsha Joǵary sottyń barlyq sýdıalaryn saılaý quzyretin joǵary ókildi organ depýtattaryna berý usynylǵanyn aıtty.

– Sonda Quryltaı konstıtýtsııalyq organdardy qalyptastyratyn bedeldi ınstıtýtqa aınalady. Bul – bılik tarmaqtary arasyndaǵy tejemelik tepe-teńdik júıesin nyǵaıtý jáne ulttyq parlamentarızmdi damytý jolyndaǵy mańyzdy qadam. Osylaısha, Jumys toby Senattyń erekshe qaraýyna kiretin ókilettikterdi qaıta qarady. Al, Májilistiń ókilettikterin Quryltaıǵa berý usynyldy. Mundaı tásil «Kúshti Prezıdent – Yqpaldy Parlament – Esep beretin Úkimet» tujyrymdamasymen tolyq úndesedi, - dedi Konstıtýtsııalyq komıssııa tóraǵasynyń orynbasary.

Aıta keteıik, Jibek Joly arnasy Konstıtýtsııalyq reforma jónindegi komıssııanyń birinshi otyrysyn tikeleı efırde kórsetip jatyr. 

Buǵan deıin Konstıtýtsııalyq komıssııanyń quramynda kimder kirgenin jazǵan edik.