Quryltaı Qazaqstandy damytýǵa kúsh salady dep úmittenemin – Qyrǵyzstan baqylaýshysy
ASTANA. KAZINFORM – Búgin Qazaqstanda mańyzdy saıası oqıǵa — Quryltaı saılaýy ótip jatyr. Onyń barysyn baqylaý úshin elimizge halyqaralyq baıqaýshylar keldi.
Solardyń qatarynda Qyrǵyz Respýblıkasy Ortalyq saılaý jáne referendýmdar ótkizý jónindegi komıssııasynyń tóraǵasy Shaınazarov Tynchtyk bar. Ol Astana qalasyndaǵy № 164 daýys berý ýchaskesine baryp, daýys berý protsesimen jáne uıymdastyrý jumystarymen tanysty. Onyń aıtýynsha, azamattardyń óz erkin bildirýi úshin barlyq qajetti jaǵdaı jasalǵan.
— Ortalyq saılaý komıssııasy basqa memlekettik organdarmen ózara is-qımyl jasaı otyryp, Qazaqstan Respýblıkasy azamattarynyń óz erkin bildirýin qamtamasyz etý úshin barynsha kúsh-jiger jumsaǵan. Azamattardyń kelip, daýys berýi úshin barlyq jaǵdaı jasalǵan, — dedi ol.
Shaınazarov ýchaskelerdegi uıymdastyrý deńgeıin joǵary baǵalap, halyqtyń belsendiligi men kóńil kúıine oń baǵa berdi. Sonymen qatar jastardyń, múmkindigi shekteýli azamattardyń saıası protseske qatysýyna jáne genderlik teńgerimge jaǵdaı jasalǵanyn atap ótti.
— Zańnamalyq turǵyda jastardyń ókildigi qamtamasyz etilgenin atap ótkim keledi. Sonymen qatar múmkindigi shekteýli azamattar da eskerilgen jáne genderlik balansqa mán berilgen. Bul qýantarlyq jaǵdaı, — dedi ol.
Halyqaralyq baqylaýshynyń pikirinshe, azamattardyń óz ókilderin tańdaý múmkindigi olardyń memleket basqarýyna qatysýyn keńeıtedi. Ol halyqty bıliktiń negizgi bastaýy retinde atap ótti.
— Bıliktiń bastaýy — halyq. Halyqtyń óz ókilderi arqyly qajetti zańdardy qabyldaý jolymen Qazaqstan Respýblıkasynyń Quryltaıy eldi damytýǵa jáne azamattardyń ál-aýqatyn arttyrýǵa kúsh salady dep úmittenemin, — dedi Shaınazarov.
Ol № 164 ýchaskedegi azamattardyń belsendiligin de atap ótip, basqa daýys berý oryndaryna barýdy josparlap otyrǵanyn aıtty.
— Basqa ýchaskelerdi de qaraımyz. Jalpy, biz rızamyz. Saılaýdy ótkizý deńgeıi joǵary dep aıtýǵa bolady, — dedi ol.
Jalpy, halyqaralyq baqylaýshy Qazaqstandaǵy saılaý protsesiniń uıymdastyrylýyna oń baǵa berdi. Onyń aıtýynsha, azamattardyń daýys berýine qajetti jaǵdaı jasalǵan, al halyqtyń belsendiligi joǵary.
Búgingi Quryltaı saılaýy — eldiń qoǵamdyq-saıası ómirindegi mańyzdy oqıǵa. Azamattardyń óz tańdaýyn bildirýi Qazaqstannyń bolashaǵyna qatysty sheshimderge qatysýynyń mańyzdy tetigi bolyp tabylady.
Aıta ketelik Armenııadan kelgen baıqaýshy qazirgi reformalar aldaǵy saıası damýdyń berik negizin qalaıtynyn aıtqan edi.
