Quryltaı qazaq halqynyń tarıhy men dástúrin beıneleıdi – Koreı qaýymdastyǵy basshysy
ASTANA. KAZINFORM – Aldaǵy Quryltaı depýtattarynyń saılaýy Qazaqstan men Azııa elderi arasyndaǵy qoǵamdyq dıplomatııa salasynda jumys isteıtin uıymdar tarapynan da qoldaý taýyp otyr. Osy mańyzdy oqıǵaǵa qatysty quttyqtaýyn joldap, onyń mańyzyna baǵa bergen Koreıa – Ortalyq Azııa dostyq qaýymdastyǵynyń prezıdenti Lı Ok Ren pikir bildirdi.
Koreıa – Ortalyq Azııa dostyq qaýymdastyǵy – Koreıa Respýblıkasynyń Syrtqy ister mınıstrligi janynan qurylǵan, qoǵamdyq dıplomatııa salasynda qyzmet etetin uıym. Ol jyldar boıy Koreıa, Ortalyq Azııa elderi jáne Qazaqstan arasyndaǵy baılanysty nyǵaıtýǵa úles qosyp keledi. Qaýymdastyq prezıdenti Lı Ok Ren Qazaqstandy aldaǵy Quryltaı depýtattarynyń saılaýymen quttyqtady.
– 23 tamyzda ótetin Qazaqstan Quryltaıynyń saılaýymen shyn júrekten quttyqtaımyn. Bul saılaý jańa konstıtýtsııalyq júıe jaǵdaıynda ótip jatyr jáne Qazaqstannyń memlekettik basqarý júıesin odan ári jańǵyrtý men demokratııany damytý jolyndaǵy mańyzdy kezeń bolady dep josparlanǵan, – dedi Lı Ok Ren.
Onyń baǵalaýynsha, burynǵy qos palataly júıeden 145 depýtattan turatyn bir palataly Quryltaıǵa kóshý – zań shyǵarý qyzmetiniń tıimdiligi men ashyqtyǵyn arttyrýǵa baǵyttalǵan mańyzdy ózgeris. Sonymen qatar ol jańa parlament ataýynyń sımvoldyq mánine de erekshe toqtaldy.
– Atap aıtqanda, burynǵy qos palataly júıeden 145 depýtattan turatyn bir palataly Quryltaıǵa kóshý – zań shyǵarý qyzmetiniń tıimdiligi men ashyqtyǵyn arttyrýǵa baǵyttalǵan mańyzdy ózgeris. Sondaı-aq «Quryltaı» ataýy qazaq halqynyń tarıhy men dástúrin saqtaýǵa degen umtylysty bildire otyryp, jańa saıası júıeni qalyptastyrý ıdeıasyn kórsetedi dep sanaımyn, – dedi ol.
Lı Ok Ren kóptegen jyl boıy Koreıa Respýblıkasy, Ortalyq Azııa jáne Qazaqstan arasyndaǵy dostyq pen yntymaqtastyqty damytýǵa atsalysyp kele jatqanyn aıtyp, aldaǵy saılaý Qazaqstannyń damýyndaǵy jańa kezeńniń bastamasy bolatynyna senim bildirdi.
– Koreıa Respýblıkasy, Ortalyq Azııa jáne Qazaqstan arasyndaǵy dostyq pen yntymaqtastyqty damytýǵa uzaq jyldar boıy úles qosyp kele jatqan adam retinde bul saılaý Qazaqstandaǵy demokratııa men memlekettiliktiń damýyndaǵy jańa kezeńge jol ashady dep shyn júrekten senemin, – dep túıindedi Lı Ok Ren.
Koreıa – Ortalyq Azııa dostyq qaýymdastyǵy basshysynyń quttyqtaýy aldaǵy Quryltaı saılaýynyń Azııadaǵy Qazaqstannyń seriktesteri tarapynan memlekettik basqarý júıesin jańǵyrtý men eldegi demokratııalyq ınstıtýttardy nyǵaıtý jolyndaǵy mańyzdy qadam retinde baǵalanatynyn taǵy bir márte aıǵaqtaıdy.
