Quryltaı: Kámeletke tolmaǵan balasy bar áıelderge qatysty zań ustanymdary qaıta qaralýy múmkin

BÝRABAI. KAZINFORM – Ulttyq quryltaıdyń IV otyrysynda  Memleket basshysy Qasym-Jomart Toqaev kámeletke tolmaǵan balasy bar áıelderge qatysty zań ustanymdaryn qaıta qaraýdy usyndy.

- Maǵan belgili advokat Aıman Omarova hat joldady. Ol óz hatynda kúrdeli taqyrypty qozǵap, áıelder kolonııasyndaǵy ahýalǵa toqtaldy. Ásirese, júkti áıelder men kishkentaı balalary bar áıelderdiń jaǵdaıyna basa nazar aýdardy. Elimizdegi qylmystyq-atqarý júıesiniń maqsaty sottalǵan azamattardy jazalaý emes, túzetý bolýy kerek degen pikirmen kelisemin. Er adam nemese áıel bolsyn, bas bostandyǵynan aıyrylǵandardyń bári zań aldynda birdeı ekeni túsinikti, - dedi Memleket basshysy.

Prezıdenttiń sózinshe, zań aldynda búkil azamat teń bolǵanymen kámeletke tolmaǵan balasy bar áıelderdiń jaǵdaıymen sanasý qajet.

- Degenmen adamgershilik qundylyqtardy basshylyqqa alyp, «Zań men tártip» qaǵıdatyn saqtaı otyryp, kámeletke tolmaǵan balasy bar áıelderge qatysty keıbir zańdyq ustanymdardy qaıta qaraýǵa bolady dep oılaımyn. Quqyq qorǵaý organdary men depýtattar osy máseleni baıypty ári jan-jaqty zerttep, sheshim qabyldaý úshin usynystar engizýi kerek, - dedi Qasym-Jomart Toqaev.

Aıta ketý kerek, quryltaıdyń paneldik sessııalary keshe bastalǵan. Ol sektsııalardyń taqyryptary azamattyq qoǵam, mádenıet, óner, rýhanııat, bilim jáne ǵylym, áleýmettik-ekonomıkalyq damý máselelerin qamtydy.