Quryltaı ınstıtýty dala demokratııasynyń biregeı úlgisi retinde qyzmet etti — Prezıdent
ASTANA. KAZINFORM — Altyn Ordanyń memlekettik basqarý júıesi turaqtylyǵyn saqtap qaldy. Bul týraly elordadaǵy Táýelsizdik saraıynda ótip jatqan «Altyn Orda — dala órkenıetiniń úlgisi: tarıh, arheologııa, mádenıet, biregeılik» atty Halyqaralyq sımpozıýmda Memleket basshysy Qasym-Jomart Toqaev aıtty.
— Budan bólek, Altyn Orda zamanynda ozyq is júrgizý júıesiniń bolǵany týraly naqty tarıhı derekter bar. Sondaı-aq Quryltaı ınstıtýty dala demokratııasynyń biregeı úlgisi retinde qyzmet etti. Ulystyń áleýmettik qurylymy aıqyn ári turaqty bolsa da, qoǵamda qatyp qalǵan qaǵıda emes, ádildik basty ról atqardy. Áskerde jáne memlekettik apparatta temirdeı tártipke, minsiz qyzmet pen merıtokratııa qaǵıdasyna erekshe nazar aýdaryldy. Munyń bári alyp derjavany meken etken barlyq etnos jáne túrli top ókilderine mol múmkindik berdi. Osylaısha, utymdy ishki jáne syrtqy saıasattyń arqasynda qoǵamda turaqtylyq saqtaldy, memleket te ósip-órkendedi, — dedi Qasym-Jomart Toqaev.
Memleket basshysynyń aıtýynsha, Altyn Orda Mysyr mámlúkterimen, Vatıkanmen, Vızantııamen, Osman ımperııasymen jáne Eýropa elderimen tyǵyz dıplomatııalyq baılanys ornatty.
— Jalpy, tarıhta «Uly dúrbeleń» degen atpen qalǵan saıası daǵdarys kezinde de Altyn Ordanyń memlekettik basqarý júıesi syr bergen joq, ıaǵnı, turaqtylyǵyn saqtap qaldy. Bul júıeni keıin Eýrazııa aımaǵyndaǵy kóptegen memleket basshylyqqa alǵany barshańyzǵa málim, — dedi Prezıdent.
Prezıdent Altyn Orda sol kezeńdegi kóptegen memleketterge qaraǵanda óz damýynda strategııalyq ashyqtyq qaǵıdatyna berik bolǵanyna nazar aýdartty.
