Quryltaı halyqaralyq júk tasymalyn damytýǵa arnalǵan qujatty qabyldady
ASTANA. KAZINFORM – Búgin Quryltaıdyń jalpy otyrysynda «Júkterdi halyqaralyq jolmen tasymaldaý sharty týraly konventsııaǵa (JTShK) elektrondyq júkqujatqa qatysty qosymsha hattamany ratıfıkatsııalaý týraly» Zańy eki oqylymda qaralyp qabyldandy.
Qujat 2008 jylǵy 20 aqpanda Jeneva qalasynda qabyldanǵan. Qosymsha hattama derekterdi elektrondyq tirkeý jáne óńdeý tehnologııalaryn paıdalana otyryp, júkqujattardy elektrondyq formatta rásimdeýge múmkindik beredi. Bul halyqaralyq júk tasymaly salasyn tsıfrlyq qujat aınalymyna kóshirýge jol ashady.
- Qazirgi ýaqytta qujattar Konventsııaǵa sáıkes qaǵaz túrinde beriledi. Qosymsha hattama qabyldanǵan keıin, olardy mınıstrliktiń qoldanystaǵy aqparattyq júıeleri arqyly elektrondyq formatta qoldanýǵa múmkindik beredi. E-CMR qoldaný qorǵalǵan baılanys kanaldarmen kózdelgen jáne tsıfrlyq qoltańbamen rastalatyn bolady. Bul júıeni engizý qujattardy rásimdeýge ketetin bıznes shyǵyndary men ákimshilik kedergilerdi azaıtýdy, sondaı-aq tasymaldaý protsesine qatysýshylar men ýákiletti organdar arasynda jedel aqparat almasýdy qamtamasyz etedi, - dedi QR Kólik vıtse-mınıstri Maqsat Qalıaqparov.
Osy oraıda ol qazir Eýropa elderi elektrondy qujattardy belsendi túrde qoldanyp jatqanyn aıtty. Sebebi ol júkterdiń jetkizýin naqty ýaqytta baqylaýǵa múmkindik beredi.
- Qazaqstannyń Hattamaǵa qosylýy avtomobıl tasymalyn tsıfrlandyrýǵa jáne eldiń kóliktik-tranzıttik áleýetin odan ári damytýǵa yqpal etedi. Sondaı-aq, Memleket basshysy Joldaýynda kólik salasyn, sonyń ishinde halyqaralyq baǵyttardy elektrondyq júıege kóshý qajettiligin atap ótti. Qazaqstan Kedeń Odaǵy aıasynda atalǵan jobany júzege asyrýǵa kiristi. Osy jyldyń 15 qazanynda Qazaqstan-Reseı baǵyty boıynsha elektrondyq júkqujattardy paıdalana otyryp, avtotasymaldaý jónindegi alǵashqy pılottyq joba iske qosyldy. Bul tasymaldaý salasyndaǵy tsıfrlyq ózara is-qımyldy odan ári keńeıtýge negiz bolady. Elektrondyq qujattardy engizý tájirıbesi oń nátıje kórsetti. E-permit júıesiniń arqasynda osy jyldyń 9 aıynda syrtqy tasymaldaý kólemi 28%-ǵa ósti. Jalpy, elektrondyq júkqujatqa kóshý elimizdiń kólik dálizderiniń tartymdylyǵyn arttyrady, - dedi vıtse-mınıstr.
Sonymen qatar ol atalǵan Hattamany ratıfıkatsııalaý respýblıkalyq bıýdjetten qosymsha qarajat bólýdi talap etpeıtinin aıtty.
Buǵan deıin habarlanǵandaı, Qazaqstanda júk tasymaldaýshylarǵa qolaıly jaǵdaı jasaý úshin shekaradaǵy ótkizý pýnktteri jańǵyrtylyp, halyqaralyq avtodálizder boıyndaǵy servıstik ınfraqurylym damıdy.
