Quryltaı, Halyq keńesi ınstıtýttary arqyly halyq bıliginiń ozyq úlgisi qalyptasady — Prezıdent

TÚRKІSTAN. KAZINFORM — Memleket basshysy Qasym-Jomart Toqaev Túrkistan oblysynyń jurtshylyǵymen kezdesýde sóz sóıledi, dep habarlaıdy Aqordanyń baspasóz qyzmeti. 

— Sonymen elimizdiń aldynda óte bıik jáne kúrdeli maqsattar tur. Biz tabandy eńbektiń arqasynda onyń bárin oryndaýymyz kerek, buǵan eshqandaı kúmán bolmaýǵa tıis, — dedi Toqaev.

Memleket basshysynyń sózinshe, kóp uzamaı Parlament qaraýyna Prezıdent, Quryltaı, Halyq keńesi, Astananyń mártebesi jáne elimizdiń ákimshilik-aýmaqtyq qurylysy týraly jańa 5 konstıtýtsııalyq zań usynylady.

— Quryltaı, Halyq keńesi ınstıtýttary arqyly halyq bıliginiń ozyq úlgisi qalyptasady. Biz tarıhı taǵdyrymyzda erekshe oryn alǵan Ordabasy quryltaıynyń 300 jyldyǵynda jańa Konstıtýtsııamyzǵa saı Quryltaıdy qaıta jańǵyrtatyn boldyq. Munyń da sımvoldyq máni bar. Sonymen qatar 8 konstıtýtsııalyq zańǵa jáne 60-tan astam zańǵa, sonyń ishinde negizgi kodeksterge túzetýler engizý qajet bolady. Osynyń bári bolashaǵymyzǵa kúshti yqpal eteri anyq. Qazaq eli san ǵasyr boıy biregeı dala zańymen ómir súrdi. Quqyqtyq memleket qurý — aıbyndy babalarymyzdyń qasterli maqsat-muraty bolǵanyn tarıhtan bárimiz jaqsy bilemiz, — dedi Prezıdent.

Budan buryn Toqaev shyn máninde janashyr urpaq qana eldiń kórkeıýine mol úles qosa alatynyn aıtty.