«Quryltaı fenomeni» kitaby Ankarada tanystyryldy
ASTANA. KAZINFORM — Túrkııa astanasy Ankara qalasynda qazaq memlekettiliginiń tarıhy men basqarý dástúrlerine arnalǵan «Quryltaı fenomeni» kitabynyń tusaýkeseri ótti. Bul týraly Kazinform agenttiginiń Ankaradaǵy menshikti tilshisi habarlady.
400 betten turatyn ǵylymı eńbek buǵan deıin Almaty men Astanada oqyrmanǵa tanystyrylǵan. Kitap qazaq, túrik, orys jáne aǵylshyn tilderinde jaryq kórgen. Eńbektiń negizine quryltaıdyń shyǵý tarıhy men onyń aımaqtyń saıası ómirindegi rólin ashyp kórsetetin tarıhı qoljazbalar alynǵan.
Kitaptyń túrik tilindegi nusqasy Túrkııadaǵy bıleýshi Ádilet jáne damý partııasynyń (AK Parti) Túrki memleketterimen baılanys jónindegi basqarmasynyń qoldaýymen jaryq kórdi.
Іs-sharaǵa dıplomatııalyq korpýs ókilderi, túrik ǵalymdary jáne Ankarada turatyn qazaqstandyqtar qatysty. Tusaýkeserden keıin quryltaıdyń tarıhı mańyzy men onyń qazirgi saıası úderisterdegi ózektiligi talqylanǵan saraptamalyq pikirtalas ótti.
Túrkııanyń Ádilet jáne damý partııasy tóraǵasynyń orynbasary Kúrshad Zorlý quryltaıdyń kóne túrki tarıhy men memlekettik basqarý dástúrlerinde mańyzdy oryn alatynyn atap ótti.
Onyń aıtýynsha, Qazaqstan parlamentiniń ataýyn Quryltaı dep ózgertý tarıhı tamyrlarǵa oralýdy bildiredi ári saıası ınstıtýttardyń sabaqtastyǵyn kórsetedi.
Kitap avtorlarynyń biri, qoǵam qaıratkeri Omarhan Óksikbaev ta bul dástúrdi jańǵyrtýdyń mańyzdylyǵyna toqtaldy. Ol Qazaqstan Prezıdenti Qasym-Jomart Toqaevtyń 2022 jyly Ulttyq quryltaı qurý jónindegi bastamasyn jáne osy ınstıtýttyń keıin Parlament deńgeıine deıin damýyn atap ótti.
Avtorlar tarıhı derekkózderdi zertteýdi jalǵastyryp, jańa ǵylymı eńbekter daıyndaýdy josparlap otyr. Qazir kitap Qazaqstannyń birqatar joǵary oqý oryndarynda tanystyrylyp jatyr. Aldaǵy ýaqytta Ázerbaıjan men Eýropa elderinde de tusaýkeser ótkizý múmkindigi qarastyrylyp jatyr.
Avtorlardyń paıymynsha, bul joba halyqaralyq aýdıtorııanyń qazaq memlekettiliginiń tarıhyna jáne qoǵamdyq ókildik dástúrleriniń damýyna degen qyzyǵýshylyǵyn arttyrýǵa yqpal etedi.
Buǵan deıin Túrkııanyń Ulttyq bilim mınıstrligi túrki áleminiń tarıhy men mádenıetine arnalǵan jańa oqý materıaldaryn ázirlegeni habarlanǵan bolatyn.
Avtor: Aqjigit Chýkýbaev
