Quryltaı depýtattarynyń úshten biri – áıelder
ASTANA. KAZINFORM — Saılaý qorytyndysynda Quryltaı depýtattyǵyna 49 áıel saılandy. Bul depýtattardyń jalpy sanynyń 33,8 paıyzyn quraıdy.
Salystyrmaly túrde, Parlamenttegi áıelderdiń úlesi 18,9 paıyz bolǵan. Eldiń zań shyǵarýshy organynda áıelder ókildiginiń artýy — erler men áıelderdiń teń quqyqtary men múmkindikterin qamtamasyz etý jónindegi júıeli memlekettik saıasattyń naqty nátıjeleriniń biri.
Elimizde áıelderdiń qoǵamdyq-saıası ómirge belsene aralasýyna, kóshbasshylyq qabiletin damytýǵa jáne sheshim qabyldaý úderisterindegi ókildigin arttyrýǵa jaǵdaı jasalyp keledi.
Qazaqstan Respýblıkasy Prezıdentiniń Jarlyǵymen bekitilgen Adam quqyqtary men zań ústemdigi salasyndaǵy is-qımyl jospary aıasynda 2024 jyly elimizdiń barlyq óńirinde ákimderdiń genderlik teńdik máseleleri jónindegi shtattan tys keńesshileri taǵaıyndaldy.
Sol jyly erler men áıelderdiń teń quqyqtary men múmkindikterin ilgeriletýdi qamtamasyz etý jónindegi Úkimettiń is-qımyl jospary bekitildi. Qujatta bilim berý, densaýlyq saqtaý, jumyspen qamtý jáne áleýmettik qorǵaý salalaryn qamtıtyn, sondaı-aq genderlik teńdik qaǵıdattaryn nyǵaıtý maqsatyndaǵy 46 is-shara bekitilgen.
Áıelderdiń saıası kóshbasshylyǵyn damytýǵa da aıryqsha mán berilip otyr.
Bul baǵytta Qazaqstan Respýblıkasy Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń qoldaýymen 2022 jyly «Tomırıs» aqparattyq-bilim berý baǵdarlamasy iske qosyldy. Ol boıynsha búginge deıin elimizdiń barlyq óńirinen 1670-ten astam áıel bilim aldy. Baǵdarlama áli de jalǵasyp jatyr.
Bıyl mamyr aıynda Mádenıet jáne aqparat mınıstrligi men BUU-nyń «BUU-áıelder» qurylymynyń birlesken jobasy aıasynda Astana men Almatyda áıelderge arnalǵan oqytý trenıngteri ótti. Oǵan qatysqan 60-qa jýyq áıel kóshbasshylyq jáne saıası quzyretterin jetildirdi.
Quryltaıdaǵy áıelder úlesiniń artýy — áıelderge teń múmkindik jasaý, olardyń kóshbasshylyq áleýetin damytý jáne qoǵamdyq-saıası ómirge belsendi qatysýyna jaǵdaı qalyptastyrý baǵytyndaǵy keshendi jumystyń nátıjesi.
Bul jumys 2026-2028 jyldarǵa arnalǵan «Áıelder. Beıbitshilik. Qaýipsizdik» kún tártibin iske asyrý jónindegi jańa is-sharalar jospary aıasynda jalǵasady. Qujatta áıelderdiń beıbitshilik pen qaýipsizdik máselelerin sheshýge atsalysýy, zorlyq-zombylyqtyń aldyn alý, kóshbasshylyqty damytý, tsıfrlyq qaýipsizdik pen ornyqty damý baǵyttary boıynsha 40 is-shara qarastyrylǵan.
Aıta ketelik Prezıdent Qasym-Jomart Toqaevtyń birinshi shaqyrylymdaǵy Quryltaıdyń birinshi sessııasynyń ashylýynda sóılegen sóziniń tolyq mátinin myna silteme arqyly ótip oqı alasyzdar.
