Quryltaı depýtattarynyń saılaýyna taǵy 10 halyqaralyq baıqaýshy akkredıtteldi
ASTANA. KAZINFORM — Quryltaı depýtattarynyń saılaýyn baqylaıtyn halyqaralyq baıqaýshylar sany 86 adamǵa jetti. Bul týraly Ortalyq saılaý komıssııasy tóraǵasynyń orynbasary Muhtar Erman habarlady.
Ortalyq saılaý komıssııasy Quryltaı depýtattarynyń saılaýyna taǵy 10 halyqaralyq baıqaýshyny akkredıttedi.
OSK otyrysynda Muhtar Erman halyqaralyq baıqaýshylardyń kezekti tobyn akkredıtteý úshin qajetti qujattar kelip túskenin málim etti.
— Olardyń qatarynda Úndistan, Indonezııa, Malaızııa jáne Ózbekstan memleketteriniń ókilderi bar. Syrtqy ister mınıstrliginen kelip túsken qujattardy qaraý qorytyndysy boıynsha Ortalyq saılaý komıssııasy olardy akkredıtteý týraly qaýly jobasyn ázirledi, — dedi Muhtar Erman.
Onyń aıtýynsha, halyqaralyq baıqaýshylardy akkredıtteý jumysy jalǵasyp jatyr.
— Búgin qabyldanǵan sheshimdi eskersek, akkredıttelgen halyqaralyq baıqaýshylardyń jalpy sany 86 adamǵa jetedi, — dedi OSK tóraǵasynyń orynbasary.
Eske sala keteıik, TMD PAA baıqaýshylary referendýmnyń uıymdastyrylýy týraly aıtqan edi.
