Quryltaı depýtattarynyń saılaýyna 34,3 mlrd teńge bólindi
ASTANA. KAZINFORM — Bul týraly Ortalyq saılaý komıssııasynyń múshesi Mıhaıl Bortnık málim etti.
Onyń aıtýynsha, respýblıkalyq bıýdjet byltyr bekitilgen kezde Quryltaı depýtattarynyń saılaýyn ótkizý josparlanbaǵan. Osyǵan baılanysty qajetti qarjy Úkimet rezervinen bólingen.
— Saılaý bıýdjeti aýmaqtyq saılaý komıssııalarynyń ótinimderi negizinde jáne saılaý týraly zańnamanyń talaptaryna sáıkes qalyptastyryldy. Onda saılaý protsesin tolyq uıymdastyrýǵa qajetti barlyq shyǵys eskerilgen, — dedi Mıhaıl Bortnık.
OSK múshesiniń málimetinshe, qarjynyń eń qomaqty bóligi — 8,5 mlrd teńge — el boıynsha jumys isteıtin 70 myńnan astam saılaý komıssııasy múshesiniń eńbekaqysyn tóleýge baǵyttalady. Bıyl respýblıka boıynsha 10 674 saılaý ýchaskesi jumys isteıdi.
Sondaı-aq bólingen qarajat esebinen 47 jańa saılaý ýchaskesi ashylady. Budan bólek, saılaý bıýlletenderi, plakattar, aqparattyq stendter men ádistemelik materıaldar daıyndalyp, saılaý komıssııalary baılanys, kólik jáne ózge de qajetti materıaldyq-tehnıkalyq quraldarmen qamtamasyz etiledi.
Sheteldegi daýys berýdi uıymdastyrýǵa da jeke qarjy qarastyrylǵan.
— Osy maqsatqa Syrtqy ister mınıstrligine 124,5 mln teńge bólingen. Bul qarajat Qazaqstannyń sheteldegi 30 saılaý ýchaskesiniń jumysyn uıymdastyrýǵa jáne saılaý bıýlletenderin jetkizýge jumsalady, — dedi komıssııa múshesi.
Aıta keteıik, Quryltaı saılaýynda jeti partııadan 546 kandıdat baq synaıdy.
