Quryltaı depýtattarynyń sany emes, sapasy mańyzdy – Maksım Rojın

ASTANA. KAZINFORM – Quryltaı zań shyǵarýmen qatar Úkimetti baqylaý máselesin iske asyrady. Bul týraly «Referendým-2026» onlaın marafony barysynda Májilis depýtaty Maksım Rojın aıtty.

– Quryltaı depýtattarynyń sany emes, sapasy mańyzdy. 145 adam eldegi zań shyǵarý, Úkimetti baqylaý máselesin iske asyrady. Óıtkeni, Parlamenttiń, aldaǵy ýaqyttaǵy Quryltaıdyń yqpaly kúsheıedi. «Kúshti Prezıdent – yqpaldy Parlament – esep beretin Úkimet» formýlasy bar. Osy qalaı iske asady? Qarapaıym tilmen aıtqanda, Prezıdent strategııalyq baǵytty aıqyndaıdy. Úkimet ony oryndaıdy. Al Quryltaı ony baqylap, soǵan saı elge qajetti zańdardy shyǵarý jumysymen aınalysady. Bul formýlada adam sany emes, sapasy mańyzdy. Zań shyǵarý protsesinde sapany kásibı deńgeıdegi Quryltaı qamtamasyz etedi. Kásibı deńgeıdegi Qurlytaıda 145 depýtattyń ǵana emes, sol Quryltaı apparatynyń da myqtylyǵy mańyzdy, - dedi Májilis depýtaty.

Sonymen qatar ol zańdardy ne úshin jyldam qabyldaý qajettigin túsindirýge tyrysty. 

– Zań eldiń ómirine tikeleı áser etedi. Sondaı-aq ol – Úkimet pen jalpy atqarýshy bıliktiń jumys isteýine tikeleı jol ashatyn qujat. Bul rette Quryltaıdyń zańdardy jyldam qabyldaýynyń Úkimetke, elde qabyldanatyn strtategııalyq dúnıelerge tikeleı áseri bar. Saǵat saıyn ózgerip jatqan álemdegi dúnıelerge elimiz tótep berýi tıis. Al tótep beretin eń birinshi organ zań shyǵaratyn – Quryltaı. Jyldamdyq osy úshin kerek, - dedi Maksım Rojın.

Buǵan deıin Májilis depýtaty Ermurat Bapı jańa Konstıtýtsııa jobasy qabyldansa, eldegi saıası partııalardyń sany artýy kerek degen paıym aıtty.