Quryltaı depýtattarynyń ókilettikteri 1,5 esege artady – Aıdos Sarym
ASTANA. KAZINFORM – Quryltaı depýtattarynyń ókilettikteri 1,5 esege artady. Bul týraly Konstıtýtsııalyq reformalar jónindegi komıssııasynyń 3-otyrysynda Májilis depýtaty Aıdos Sarym aıtty.
Onyń aıtýynsha, bolashaq Quryltaıdyń 145 depýtaty bolady. Olar proportsıonaldy saılaý júıesi arqyly 5 jylǵa saılanady. Bul rette 25 jasqa tolǵan, sońǵy 10 jyl boıy el aýmaǵynda turatyn Qazaqstan azamaty Quryltaı depýtaty bolyp saılana alady.
– Menińshe, Konstıtýtsııanyń 53-baby bolashaq Quryltaıdyń jumysymen baılanysty eń mazmundy túbegeıli ózgeristerdi kózdeıdi. Bul qoǵamymyzǵa qajetti, qoǵam bizden kútip otyrǵan ózgerister. Bul ózgerister elimizdegi memlekettik basqarý arhıtektýrasy men júıesin baıypty túrde ózgertip, turaqtandyrady, bılik tarmaqtary arasyndaǵy qajetti teńgerimdi qamtamasyz etedi, ókildik, atqarýshy jáne sot bıligi arasyndaǵy tejeý men teńgerim tujyrymyn iske asyrady, - dedi deptýtat.
Májilis deptýtaty qoldanystaǵy Konstıtýtsııasynda Parlament palatalarynyń fýnktsııalaryn naqty sıpattaıtyn 53-bap 13 tarmaqtan turǵan atap ótti.
– Al salystyrmaly kestede usynylǵan jańa redaktsııada, 23 tarmaq bar ekenine nazarlaryńyzdy aýdarǵym keledi, ıaǵnı, ókilettikter kólemi bir jarym eseden astam artady. Bul jańa ókilettikterdiń barlyǵy jalpyulttyq referendýmda maquldanǵan jaǵdaıda tıisti Konstıtýtsııalyq zańdar aıasynda naqtylanyp, júzege asyrylatyn bolady. Atalǵan ózgerister túrli qoǵamdyq alańdarda birneshe ret aıtylyp, jumys tobynyń otyrystarynda jan-jaqty talqylandy jáne Qyzylorda qalasynda ótken Ulttyq Quryltaıda Memleket basshysynyń tarapynan tujyrymdamalyq turǵyda qoldaý tapty. Sondyqtan bul tujyrymdamalyq ózgeristerdi biz qoldaımyz, - dedi Aıdos Sarym.
Májilis depýtaty Ashat Rahymjanovtyń paıymynsha, Qazaqstandaǵy konstıtýtsııalyq reforma memlekettik bılikti barynsha ashyq, qoǵam aldynda esep beretin jáne azamattarǵa jaqyn etýge baǵyttalǵan.