Quryltaı depýtattarynyń mandattaryna qansha úmitker tirkeldi
ASTANA. KAZINFORM — Qazaqstan Respýblıkasy Ortalyq saılaý komıssııasynda Quryltaı depýtattyǵyna kandıdattardyń partııalyq tizimderin tirkeý qorytyndylary jarııalandy.
OSK hatshysy Shavhat Ótemisovtiń málimetinshe, Konstıtýtsııalyq zańnyń 89-babyna sáıkes, partııalyq tizimderdi tirkeýdi Ortalyq saılaý komıssııasy júzege asyrady.
— Ortalyq saılaý komıssııasy Quryltaı depýtattyǵyna kandıdattardyń Konstıtýtsııa men saılaý týraly Konstıtýtsııalyq zań talaptaryna sáıkestigin tekserdi. Ýákiletti memlekettik organdardyń resmı jaýaptaryna sáıkes, partııalyq tizimderge engizilgen barlyq azamat zań talaptaryna tolyq sáıkes keledi. Osyǵan baılanysty Ortalyq saılaý komıssııasy Quryltaı saılaýyna qatysý úshin usynylǵan barlyq jeti saıası partııanyń partııalyq tizimderin tirkedi, — dedi Shavhat Ótemisov.
Onyń aıtýynsha, tirkelgen partııalyq tizimderge «Aq jol» Qazaqstannyń demokratııalyq partııasynan — 63, «Aýyl» partııasynan — 69, «Ádilet» partııasynan — 186, Qazaqstannyń «Baıtaq» jasyldar partııasynan — 47, Jalpyulttyq sotsıal-demokratııalyq partııadan — 33, Qazaqstannyń Halyq partııasynan — 72 jáne «Respublica» partııasynan 75 kandıdat engizilgen.
Osylaısha, 2026 jylǵy 23 shildedegi jaǵdaı boıynsha Quryltaı depýtattarynyń mandattaryna úmitker jeti saıası partııanyń tizimine barlyǵy 545 kandıdat tirkeldi. Quryltaıdaǵy depýtattyq mandattardyń jalpy sany — 145.
Sonymen qatar barlyq saıası partııa áıelder, jastar jáne múgedektigi bar adamdardyń ókildigine qoıylatyn zań talaptaryn saqtaǵan. Barlyq partııalyq tizim boıynsha atalǵan sanattardyń jıyntyq úlesi 43,9 paıyzdy quraıdy.
Aıta keteıik, EQYU mıssııasy Qazaqstandaǵy Quryltaı saılaýyn baqylaýǵa kiriskeni belgili boldy.
