Quryltaı depýtattarynyń mandaty partııalar arasynda qalaı bólinedi
ASTANA. KAZINFORM – Ortalyq saılaý komıssııasynyń hatshysy Shavkat Ótemisov Quryltaı depýtattarynyń mandaty 5 paıyzdyq mejeden asqan partııalar arasynda qalaı bólinetinin túsindirdi.
- 5 paıyzdan joǵary alǵan partııalarǵa berilgen daýystar bolashaq Quryltaı depýtattarynyń mandattaryna bólinedi. Naqty bir partııa qansha mandat alatynyn qazir aıta almaımyz. Onyń bári esep, formýla negizinde jasalady. Ótken partııalardyń daýystary, olardyń sommasy 145 mandatqa bólinedi. Ol kvota dep atalady. Máselen, «Ádilet» partııasyna, «Aýyl» partııasyna berilgen daýystar jańaǵy kvotaǵa bólinip shyǵarylady. Aınalyp kelgende qaı partııaǵa qansha mandat tıesili ekeni anyqtalady, - dep túsindirdi ol.
Shavkat Ótemisov saılaýshylardyń 5 paıyz daýysyn jınaǵan partııadan qansha adam naqty depýtat bolatynyn aıtý áli erte ekendigin atap ótti.
- Ony esepteý kerek. Qazir aıtýǵa kelmeıdi. Sebebi qazirgi bizdiń aıtyp otyrǵanymyz aldyn ala berilgen qorytyndy. Qorytyndyny resmı túrde 10 kúnniń ishinde jarııalaýymyz kerek. Sonda ǵana naqty qaı partııa qansha mandatqa ıe bolatynyn aıtamyz, - dedi komıssııa hatshysy.
Ol resmı qorytyndy naqty qaı kúni shyǵarylatyn atamady.
- Eń mańyzdysy - árbir ýchaskelik komıssııanyń mórmen, komıssııa músheleriniń qoldarymen rásimdelgen hattamasyn bizge jetkizý kerek. Hattamanyń túpnusqasyn alǵannan keıin keıin bárin eseptep naqty tsıfrlar shyǵaramyz, - dedi Shavkat Ótemisov.
Buǵan deıin Quryltaı depýtattary saılaýynyń nátıjesin jarııalaǵan edik.
