Quryltaı depýtattaryn saılaýǵa 9 mln 351 myń adam qatysty
ASTANA. KAZINFORM – Quryltaı depýtattaryn saılaýǵa 9 mln 351 myń adam qatysty. Bul týraly Ortalyq saılaý komıssııasynyń tóraǵasy Nurlan Ábdirov málim etti.
- Astananyń, oblystardyń jáne respýblıkalyq mańyzy bar qalalardyń saılaý komıssııalarynan kelip túsken jedel derekterdiń negizinde Ortalyq saılaý komıssııasynyń 2026 jylǵy 23-shi tamyzda ótken Quryltaı depýtattaryn saılaýdyń aldyn ala nátıjelerin jarııalaý múmkindigi bar. Keshe kúni boıy ózekti onlaın rejımde óńirlerdiń jedel derekteri negizinde Ortalyq saılaý komıssııasy azamattardyń saılaýda daýys berýge qatysý barysy týraly jurtshylyqty BAQ arqyly turaqty habardar etip otyrdy. 7 brıfıng ótkizildi. Barlyq aqparat múmkindiginshe tez usynyldy, - dedi ol.
Komıssııa tóraǵasynyń aıtýynsha, osy ýaqytqa deıin elimizdiń barlyq óńirinde jáne shet elde barlyǵy 10 423 saılaý ýchaskesinde daýystardy sanaý aıaqtaldy. Qazirgi ýaqytta aýmaqtyq saılaý komıssııalary daýys berý nátıjeleri týraly hattamalardyń elektrondyq kóshirmelerin usyndy, - dedi Nurlan Ábdirov.
Nurlan Ábdirovtiń málimetinshe, saılaýshylardyń naqtylanǵan tizimderine sáıkes, Qazaqstan Respýblıkasy saılaýshylarynyń jalpy sany 12 623 289 adamdy qurady.
- Onyń ishinde tsıfrlyq úkimet portaly men azamattardy tirkelgen jeri týraly málimetterdi tekserý jáne daýys berý ýchaskeleriniń mekenjaılary boıynsha azamattardy tirkeý onlaın servısteri arqyly 9 865 adam engizildi. Saılaýǵa 9 351 539 adam nemese tizimge engizilgen azamattardyń 74,08 paıyzy qatysty, - dedi ol.
Aıta keteıik, buǵan deıin OSK Quryltaı depýtattary saılaýynyń nátıjesin jarııa etti.
